Section 8

:C8 atha śītantrāloke aṣṭamamāhnikaṃ deśādhvano@pyatha samāsavikāsayogātsaṃgīyate vidhirayaṃ śivaśāstradṛṣṭaḥ // 1b [AbhT_8.1] vicārito@yaṃ kālādhvā kriyāśaktimayaḥ prabhoḥ / mūrtivaicitryajastajjo deśādhvātha nirūpyate // 2 [AbhT_8.2] adhvā samasta evāyaṃ cinmātre saṃpratiṣṭhitaḥ / yattatra nahi viśrāntaṃ tannabhaḥkusumāyate // 3 [AbhT_8.3] saṃviddvāreṇa tatsṛṣṭe śūnye dhiyi marutsu ca / nāḍīcakrānucakreṣu barhirdehe@dhvasaṃsthitiḥ // 4 [AbhT_8.4] tatrādhvaivaṃ nirūpyo@yaṃ yatastatprakriyākramam / anusaṃdadhadeva drāg yogī bhairavatāṃ vrajet // 5 [AbhT_8.5] didṛkṣayaiva sarvārthān yadā vyāpyāvatiṣṭhate / tadā kiṃ bahunoktena ityuktaṃ spandaśāsane // 6 [AbhT_8.6] jñātvā samastamadhvānaṃ tadīśeṣu vilāpayet / tān dehaprāṇadhīcakre pūrvavad gālayetkramāt // 7 [AbhT_8.7] tatsamastaṃ svasaṃvittau sā saṃvidbharitātmikā / upāsyamānā saṃsārasāgarapralayānalaḥ // 8 [AbhT_8.8] śrīmahīkṣottare caitānadhveśān gururabravīt / brahmānantātpradhānāntaṃ viṣṇuḥ puṃsaḥ kalāntagam // 9 [AbhT_8.9] rudro granthau ca māyāyāmīśaḥ sādākhyagocare / anāśritaḥ śivastasmādvyāptā tadvyāpakaḥ paraḥ // 10 [AbhT_8.10] evaṃ śivatvamāpannamiti matvā nyarūpyata / na prakriyāparaṃ jñānamiti svacchandaśāsane // 11 [AbhT_8.11] triśiraḥśāsane bodho mūlamadhyāgrakalpitaḥ / ṣaṭtriṃśattattvasaṃrambhaḥ smṛtirbhedavikalpanā // 12 [AbhT_8.12] avyāhatavibhāgo@smibhāvo mūlaṃ tu bodhagam / samastatattvabhāvo@yaṃ svātmanyevāvibhāgakaḥ // 13 [AbhT_8.13] bodhamadhyaṃ bhavetkiṃcidādhārādheyalakṣaṇam / tattvabhedavibhāgena svabhāvasthitilakṣaṇam // 14 [AbhT_8.14] bodhāgraṃ tattu vidbodhaṃ nistaraṅgaṃ bṛhatsukham / saṃvidekātmatānītabhūtabhāvapurādikaḥ // 15 [AbhT_8.15] avyavacchinnasaṃvittirbhairavaḥ parameśvaraḥ / śrīdevyāyāmale coktaṃ ṣaṭtriṃśattattvasundaram // 16 [AbhT_8.16] adhvānaṃ ṣaḍvidhaṃ dhyāyansadyaḥ śivamayo bhavet / yadyapyamuṣya nāthasya saṃvittyanatirekiṇaḥ // 17 [AbhT_8.17] pūrṇasyordhvādimadhyāntavyavasthā nāsti vāstavī / tathāpi pratipattṝṇāṃ pratipādayitustathā // 18 [AbhT_8.18] svasvarūpānusāreṇa madhyāditvādikalpanāḥ / tataḥ pramātṛsaṃkalpaniyamāt pārthivaṃ viduḥ // 19 [AbhT_8.19] tattvaṃ sarvāntarālasthaṃ yatsarvāvaraṇairvṛtam / tadatra pārthive tattve kathyate bhuvanasthitiḥ // 20 [AbhT_8.20] netā kaṭāharudrāṇāmanantaḥ kāmasevinām / potārūḍho jalasyāntarmadyapānavighūrṇitaḥ // 21 [AbhT_8.21] sa devaṃ bhairavaṃ dhyāyan nāgaiśca parivāritaḥ / kālāgrerbhuvanaṃ cordhve koṭiyojanamucchritam // 22 [AbhT_8.22] lokānāṃ bhasmasādbhāvabhayānnordhva sa vīkṣate / sa ca vyāptāpi viśvasya yasmātpluṣyannimāṃ bhuvam // 23 [AbhT_8.23] narakebhyaḥ purā vyaktastenāsau tadadho mataḥ / daśa koṭyo vibhorjvālā tadardha śūnyamūrdhvataḥ // 24 [AbhT_8.24] tadūrdhve narakādhīśāḥ kramādduḥkhaikavedanāḥ / śdho madhye tadūrdhve ca sthitā bhedāntarairvṛtāḥ // 25 [AbhT_8.25] avīcikumbhīpākākhyarauravāsteṣvanukramāt / ekādaśaikādaśa ca daśetyantaḥ śarāgni tat // 26 [AbhT_8.26] pratyekameṣāmekonā koṭirucchritirantaram / lakṣamatra khavedāsyasaṃkhyānāmantarā sthitiḥ // 27 [AbhT_8.27] kūṣmāṇḍa ūrdhve lakṣonakoṭisthānastadīśitā / śāstraviruddhācaraṇāt kṛṣṇaṃ ye karma vidadhate // 28 [AbhT_8.28] tatra bhīmairlokapuruṣaiḥ pīḍyante bhogaparyantam / ye sakṛdapi parameśaṃ śivamekāgreṇa cetasā śaraṇam // 29 [AbhT_8.29] yānti na te narakayujaḥ kṛṣṇaṃ teṣāṃ sukhālpatādāyi / sahasranavakotsedhamekāntaramatha kramāt // 30 [AbhT_8.30] pātālāṣṭakamekaikamaṣṭame hāṭakaḥ prabhuḥ / pratilokaṃ niyuktātmā śrīkaṇṭho haṭhato bahūḥ // 31 [AbhT_8.31] siddhīrdadātyasāvevaṃ śrīmadrauravaśāsane / vratino ye cikarmasthā niṣiddhācārakāriṇaḥ // 32 [AbhT_8.32] dīkṣitā api ye luptasamayā naca kurvate / prāyaścittāṃstathā tatsthā vāmācārasya dūṣakāḥ // 33 [AbhT_8.33] devāgnidravyavṛttyaṃśajīvinaścottamasthitāḥ / adhaḥsthagāruḍādyanyamantrasevāparāyaṇāḥ // 34 [AbhT_8.34] te hāṭakavibhoragre kiṅkarā vividhātmakāḥ / te tu tatrāpi deveśaṃ bhaktyā cetparyupāsate // 35 [AbhT_8.35] tadīśatattve līyante kramācca parame śive / anyathā ye tu vartante tadbhoganiratātmakāḥ // 36 [AbhT_8.36] te kālavahnisaṃtāpadīnākrandaparāyaṇāḥ / guṇatattve nilīyante tataḥ sṛṣṭimukhe punaḥ // 37 [AbhT_8.37] pātyante mātṛbhirghorayātanaughapurassaram / adhamādhamadeheṣu nijakarmānurūpataḥ // 38 [AbhT_8.38] mānuṣānteṣu tatrāpi kecinmantravidaḥ kramāt / mucyante@nye tu badhyante pūrvakṛtyānusārataḥ // 39 [AbhT_8.39] ityeṣa gaṇavṛttānto nāmnā hulahulādinā / proktaṃ bhagavatā śrīmadānandādhikaśāsane // 40 [AbhT_8.40] pātālordhve sahasrāṇi viṃśatirbhūkaṭāhakaḥ / siddhātantre tu pātālapṛṣṭhe yakṣīsamāvṛtam // 41 [AbhT_8.41] bhadrakālyāḥ puraṃ yatra tābhiḥ krīḍanti sādhakāḥ / tatastamastaptabhūmistataḥśūnyaṃ tato@hayaḥ // 42 [AbhT_8.42] etāni yātanāsthānaṃ gurumantrādidūṣiṇām / tato bhūmyūrdhva [madhya] to meruḥ sahasrāṇi sa ṣoḍaśa // 43 [AbhT_8.43] magnastanmūlavistārastaddvayenordhvavistṛtiḥ / sahasrābdhivasūcchrāyo haimaḥ sarvāmarālayaḥ // 44 [AbhT_8.44] madhyordhvādhaḥ samudvṛttaśarāvacaturaśrakaḥ / bhairavīyaṃ ca talliṅgaṃ dharaṇī cāsya pīṭhikā // 45 [AbhT_8.45] sarve devā nilīnā hi tatra tatpūjitaṃ sadā / madhye merusabhā dhātustadīśadiśi ketanam // 46 [AbhT_8.46] jyotiṣkaśikharaṃ śaṃbhoḥ śrīkaṇṭhāṃśaśca sa prabhuḥ / avaruhya sahasrāṇi manovatyāścaturdaśa // 47 [AbhT_8.47] cakravāṭaścaturdikko meruratra tu lokapāḥ / amarāvatikendrasya pūrvasyāṃ dakṣiṇena tām // 48 [AbhT_8.48] atsaraḥsiddhasādhyāstāmuttareṇa vināyakāḥ / tejovatī svadiśyagneḥ purī tāṃ paścimena tu // 49 [AbhT_8.49] viśvedevā viśvakarmā kramāttadanugāśca ye / yāmyāṃ saṃyamanī tāṃ tu paścimena kramāt sthitāḥ // 50 [AbhT_8.50] mātṛnandā svasaṃkhyātā rudrāstatsādhakāstathā / kṛṣṇāṅgārā nirṛtiśca tāṃ pūrveṇa piśācakāḥ // 51 [AbhT_8.51] rakṣāṃsi siddhagandharvāstūttareṇottareṇa tām / vāruṇī śuddhavatyākhyā bhūtaugho dakṣiṇena tām // 52 [AbhT_8.52] uttareṇottareṇaināṃ vasuvidyādharāḥ kramāt / vāyorgandhavatī tasyā dakṣiṇe kinnarāḥ punaḥ // 53 [AbhT_8.53] vīṇāsarasvatī devī nāradastumburustathā / mahodayendorguhyāḥ syuḥ paścime@syāḥ punaḥ punaḥ // 54 [AbhT_8.54] kuberaḥ karmadevāśca tathā tatsādhakā api / yaśasvinī maheśasya tasyāḥ paścimato hariḥ // 55 [AbhT_8.55] dakṣiṇe dakṣiṇe brahmāśvinau dhanvantariḥ kramāt / mairave cakravāṭe@sminnevaṃ mukhyāḥ puro@ṣṭadhā // 56 [AbhT_8.56] antarālagatāstvanyāḥ punaḥ ṣaḍviṃśatiḥ smṛtāḥ / iṣṭāpūrtaratāḥ puṇye varṣeye bhārate narāḥ // 57 [AbhT_8.57] te merugāḥ sakṛcchambhuṃ ye vārcanti yathocitam / meroḥ pradakṣiṇāpyodagdikṣu viṣkambhaparvatāḥ // 58 [AbhT_8.58] mandaro gandhamādaśca vipulo@tha supārśvakaḥ / sitapītanīlaraktāste kramātpādaparvatāḥ // 59 [AbhT_8.59] etairbhuvamavaṣṭabhya merustiṣṭhati niścalaḥ / caitrarathanandanākhye vaiśrājaṃ pitṛvanaṃ vanānyāhuḥ // 60 [AbhT_8.60] raktodamānasasitaṃ bhadraṃ caitaccatuṣṭayaṃ sarasām / vṛkṣāḥ kadambajambvaśvatthanyagrodhakāḥ kramaśaḥ // 61 [AbhT_8.61] eṣu ca caturṣvacaleṣu trayaṃ trayaṃ kramaśa etadāmnātam / mervadho lavaṇābdhyantaṃ jambudvīpaḥ samantataḥ // 62 [AbhT_8.62] lakṣamātraḥ sa navadhā jāto maryādaparvataiḥ / niṣadho hemakūṭaśca himavāndakṣiṇe trayaḥ // 63 [AbhT_8.63] lakṣaṃ sahasranavatistadaśītiriti kramāt / nīlaḥ śvetastriśṛṅgaśca tāvantaḥ savyataḥ punaḥ // 64 [AbhT_8.64] meroḥ ṣaḍete maryādācalāḥ pūrvāparāyatāḥ / pūrvato mālyavānpaścādgandhamādanasaṃjñitaḥ // 65 [AbhT_8.65] savyottarāyatau tau tu catustriṃśatsahasrakau / aṣṭāvete tato@pyanyau dvau dvau pūrvādiṣu kramāt // 66 [AbhT_8.66] jāṭharaḥ kūṭahimavadyātrajārudhiśṛṅgiṇaḥ / evaṃ sthito vibhāgo@tra varṣasiddhyai nirūpyate // 67 [AbhT_8.67] samantāccakravāṭādho@narkendu caturaśrakam / sahasranavavistīrṇamilākhyaṃ trimukhāyuṣam // 68 [AbhT_8.68] meroḥ paścimato gandhamādo yastasya paścime / ketumālaṃ kulādrīṇāṃ saptakena vibhūṣitam // 69 [AbhT_8.69] meroḥ pūrva mālyavānyo bhadrāśvastasya pūrvataḥ / sahasradaśakāyustatsapañcakulaparvatam // 70 [AbhT_8.70] pūrvapaścimataḥ savyottarataśca kramādime / dvātriṃśacca catustriṃśatsahasrāṇi nirūpite // 71 [AbhT_8.71] merorudak śṛṅgavānyastadbahiḥ kuruvarṣakam / cāpavannavasāhasramāyustatra trayodaśa // 72 [AbhT_8.72] kuruvarṣasyottare@tha vāyavye@bdhau kramāccharāḥ / daśa ceti sahasrāṇi dvīpau candro@tha bhadrakaḥ // 73 [AbhT_8.73] yau śvetaśṛṅgiṇau merorvāme madhye hiraṇmayam / tayornavakavistīrṇamāyuścārdhatrayodaśa // 74 [AbhT_8.74] tatra vai vāmataḥ śvetanīlayo ramyako@ntare / sahasranavavistīrṇamāyurdvādaśa tāni ca // 75 [AbhT_8.75] merordakṣiṇato hemaniṣadhau yau tadantare / haryākhyaṃ navasāhasraṃ tatsahasrādhikāyuṣam // 76 [AbhT_8.76] tatraiva dakṣiṇe hemahimavaddvitayāntare / kainnaraṃ navasāhasraṃ tatsahasrādhikāyuṣam // 77 [AbhT_8.77] tatraiva dakṣiṇe merorhimavānyasya dakṣiṇe / bhārataṃ navasāhasraṃ cāpavatkarmabhogabhūḥ // 78 [AbhT_8.78] ilāvṛtaṃ ketubhadraṃ kuruhairaṇyaramyakam / harikinnaravarṣe ca bhogabhūrna tu karmabhūḥ // 79 [AbhT_8.79] atra bāhulyataḥ karmabhūbhāvo@trāpyakarmaṇām / paśūnāṃ karmasaṃskāraḥ syāttādṛgdṛḍhasaṃskṛteḥ // 80 [AbhT_8.80] saṃbhavantyapyasaṃskārā bhārate@nyatra cāpi hi / dṛḍhaprāktanasaṃskārādīśecchātaḥ śubhāśubham // 81 [AbhT_8.81] sthānāntare@pi karmāsti dṛṣṭaṃ tacca purātane / tatra tretā sadā kālo bhārate tu caturyugam // 82 [AbhT_8.82] bhārate navakhaṇḍaṃ ca sāmudreṇāmbhasātra ca / sthalaṃ pañcaśatī tadvajjalaṃ ceti vibhajyate // 83 [AbhT_8.83] indraḥ kaśerustāmrābho nāgīyaḥ prāggabhastimān / saumyagāndharvavārāhāḥ kanyākhyaṃ cāsamudrataḥ // 84 [AbhT_8.84] kanyādvīpe ca navame dakṣiṇenābdhimadhyagāḥ / upadvīpāḥ ṣaṭ kulādrisaptakena vibhūṣite // 85 [AbhT_8.85] aṅgayavamalayaśaṅkuḥ kumudavarāhau ca malayago@gastya / tatraiva ca trikūṭe laṅkā ṣaḍamī hyupadvīpāḥ // 86 [AbhT_8.86] dvīpopadvīpagāḥ prāyo mlecchā nānāvidhā janāḥ / muktākāñcanaratnāḍhyā iti śrīruruśāsane // 87 [AbhT_8.87] bhārate yatkṛtaṃ karma kṣapitaṃ vāpyavīcitaḥ / śivāntaṃ tena muktirvā kanyākhye tu viśeṣataḥ // 88 [AbhT_8.88] mahākālādikā rudrakoṭiratraiva bhārate / gaṅgādipañcaśatikā janma tenātra durlabham // 89 [AbhT_8.89] anyavarṣeṣu paśuvad bhogātkarmātivāhanam / prāpyaṃ manorathātītamapi bhāratajanmanām // 90 [AbhT_8.90] nānāvarṇāśramācārasukhaduḥkhavicitratā / kanyādvīpe yatastena karmabhūḥ seyamuttamā // 91 [AbhT_8.91] puṃsā sitāsitānyatra kurvatāṃ kila siddhyataḥ / parāparau svarnirayāviti rauravavārtike // 92 [AbhT_8.92] evaṃ meroradho jambūrabhito yaḥ sa vistarāt / syāt saptadaśadhā khaṇḍairnavabhistu samāsataḥ // 93 [AbhT_8.93] manoḥ svāyaṃbhuvasyāsan sutā daśa tatastrayaḥ / prāvrajannatha jambvākhye rājā yo@gnīdhranāmakaḥ // 94 [AbhT_8.94] tasyābhavannava sutāstato@yaṃ navakhaṇḍakaḥ / nābhiryo navamastasya naptā bharata ārṣabhiḥ // 95 [AbhT_8.95] tasyāṣṭau tanayāḥ sākaṃ kanyayā navamoṃ@śakaḥ / bhuktaistairnavadhā tasmāllakṣayojanamātrakāt // 96 [AbhT_8.96] lakṣaikamātro lavaṇastadbāhye@sya puro@drayaḥ / ṛṣabho dundubhirdhūmraḥ kaṅkadroṇendavo hyudak // 97 [AbhT_8.97] varāhanandanāśokāḥ paścāt sahabalāhakau / dakṣiṇa cakramainākau vāḍavo@ntastayoḥ sthitaḥ // 98 [AbhT_8.98] abdherdakṣiṇataḥ khākṣisahasrātikramād giriḥ / vidyutvāṃstrisahasrocchridāyāmo@tra phalāśinaḥ // 99 [AbhT_8.99] maladigdhā dīrghakeśaśmaśravo gosadharmakāḥ / nagnāḥ saṃvatsarāśītijīvinastṛṇabhojinaḥ // 100 [AbhT_8.100] niryantrāṇi sadā tatra dvārāṇi bilasiddhaye / ityetad gurubhirgītaṃ śrīmadrauravaśāsane // 101 [AbhT_8.101] itthaṃ ya eṣa lavaṇasamudraḥ pratipāditaḥ / tadbahiḥ ṣaḍamī dvīpāḥ pratyekaṃ svārṇavairvṛtāḥ // 102 [AbhT_8.102] kramadviguṇitāḥ ṣaḍbhirmanuputrairadhiṣṭhitāḥ / śākakuśakrauñcāḥ śalmaligomedhābjamiti ṣaḍdvīpāḥ / kṣīradadhisarpiraikṣavamadirāmadhurāmbukāḥ ṣaḍambudhayaḥ // 103 [AbhT_8.103] medhātithirvapuṣmāñjyotiṣmāndyutimatā havī rājā / saṃvara iti śākādiṣu jambudvīpe nyarūpi cāgnīdhraḥ // 104 [AbhT_8.104] girisaptakaparikalpitatāvatkhaṇḍāstu pañca śākādyāḥ / puṣkarasaṃjño dvidalo hariyamavaruṇendavo@tra pūrvādau // 105 [AbhT_8.105] tripañcāśacca lakṣāṇi dvikoṭyayutapañcakam / svādvarṇavāntaṃ mervardhādyojananāmiyaṃ pramā // 106 [AbhT_8.106] saptamajaladherbāhye haimī bhūḥ koṭidaśakamatha lakṣam / ucchrityā vistārādayutaṃ loketarācalaḥ kathitaḥ // 107 [AbhT_8.107] lokālokadigaṣṭaka saṃsthaṃ rudrāṣṭakaṃ salokeśam / kevalamityapi kecillokālokāntare ravirna bahiḥ // 108 [AbhT_8.108] pitṛdevapathāvasyodagdakṣiṇagau svajātpare vīthyau / bhānoruttaradakṣiṇamayanadvayametadeva kathayanti // 109 [AbhT_8.109] 'sarveṣāmuttaro merurlokālokaśca dakṣiṇaḥ.' udayāstamayāvitthaṃ sūryasya paribhāvayet // 110 [AbhT_8.110] ardharātro@marāvatyāṃ yāmyāyāmastameva ca / madhyandinaṃ tadvāruṇyāṃ saumye sūryodayaḥ smṛtaḥ // 111 [AbhT_8.111] udayo yo@marāvatyāṃ so@rdharātro yamālaye / ke@staṃ saumye ca madhyāhna itthaṃ sūryagatāgate // 112 [AbhT_8.112] pañcatriṃ śatkoṭisaṃkhyā lakṣāṇyekonaviṃśatiḥ / catvāriṃśatsahasrāṇi dhvāntaṃ lokācalādbahiḥ // 113 [AbhT_8.113] saptasāgaramānastu garbhodākhyaḥ samudrarāṭ / lokālokasya parato yadgarbhe nikhilaiva bhūḥ // 114 [AbhT_8.114] siddhātantre@tra garbhābdhestīre kauśeyasaṃjñitam / maṇḍalaṃ garuḍastatra siddhapakṣasamāvṛtaḥ // 115 [AbhT_8.115] krīḍantiṃ parvatāgre te nava cātra kulādrayaḥ / tata uṣṇodakāstriṃśannadyaḥpātālagāstataḥ // 116 [AbhT_8.116] caturdiṅnaimirodyānaṃ yoginīsevitaṃ sadā / tato merustato nāgā meghā hemāṇḍakaṃ tataḥ // 117 [AbhT_8.117] brahmaṇo@ṇḍakaṭāhena merorardhena koṭayaḥ / pañcāśadevaṃ daśasu dicu bhūrlokasaṃjñitam // 118 [AbhT_8.118] paśukhagamṛgatarumānuṣasarīsṛpaiḥ ṣaḍbhireṣa bhūrlokaḥ / vyāptaḥ piśācarakṣogandharvāṇāṃ sayakṣāṇām // 119 [AbhT_8.119] vidyābhṛtāṃ ca kiṃ vā bahunā sarvasya bhūtasargasya / abhimānato yatheṣṭaṃ bhogasthānaṃ nivāsaśca // 120 [AbhT_8.120] bhuvarlokastathā tvārkāllakṣamekaṃ tadantare / daśa vāyupathāste ca pratyekamayutāntarāḥ // 121 [AbhT_8.121] ādyo vāyupathastatra vitataḥ paricarcyate / pañcāśadyojanordhve syādṛtarddhirnāma mārutaḥ // 122 [AbhT_8.122] āpyāyakaḥ sa jantūnāṃ tataḥ prācetaso bhavet / pañcāśadyojanādūrdhva tasmādūrdhva śatena tu // 123 [AbhT_8.123] senānīvāyuratraite mūkameghāstaḍinmucaḥ / ye mahyāḥ krośamātreṇa tiṣṭhanti jalavarṣiṇaḥ // 124 [AbhT_8.124] tebhya ūrdhva śatānmeghā bhekādiprāṇivarṣiṇaḥ / pañcāśadūrdhvamogho@tra viṣavāripravarṣiṇaḥ // 125 [AbhT_8.125] meghāḥ skandodbhavāścānye piśācā oghamārute / tataḥ pañcāśadūrdhvaṃ syurmeghā mārakasaṃjñakāḥ // 126 [AbhT_8.126] tatra sthāne mahādevajanmānaste vināyakāḥ / ye haranti kṛtaṃ karma narāṇāmakṛtātmanām // 127 [AbhT_8.127] pañcāśadūrdhvaṃ vajrāṅko vāyuratropalāmbudāḥ / vidyādharādhamāścātra vajrāṅke saṃpratiṣṭhitāḥ // 128 [AbhT_8.128] ye vidyāpauruṣe ye ca śmaśānādiprasādhane / mṛtāstatsiddhisiddhāste vajrāṃke maruti sthitāḥ // 129 [AbhT_8.129] pañcāśadūrdhvaṃ vajrāṃkādvaidyuto@śanivarṣiṇaḥ / abdā apsarasaścātra ye ca puṇyakṛto narāḥ // 130 [AbhT_8.130] bhṛgau vahnau jale ye ca saṃgrāme cānivartinaḥ / gograhe vadhyamokṣe vā mṛtāste vaidyute sthitāḥ // 131 [AbhT_8.131] vaidyutādraivatastāvāṃstatra puṣṭivahāmbudāḥ / ūrdhvaṃ ca rogāmbumucaḥ saṃvartāstadanantare // 132 [AbhT_8.132] rocanāñjanabhasmādisiddhāstatraiva raivate / krodhodakamucāṃ sthānaṃ viṣāvartaḥ sa mārutaḥ // 133 [AbhT_8.133] pañcāśadūrdhvaṃ tatraiva durdinābdā hutāśajāḥ / vidyādharaviśeṣāśca tathā ye parameśvaram // 134 [AbhT_8.134] gāndharveṇa sadārcanti viṣāvarte@tha te sthitāḥ / viṣāvartācchatādūrdhva durjayaḥ śvāsasaṃbhavaḥ // 135 [AbhT_8.135] brahmaṇo@tra sthitā meghāḥ pralaye vātakāriṇaḥ / puṣkarābdā vāyugamā gandharvāśca parāvahe // 136 [AbhT_8.136] jīmūtameghāstatsaṃjñāstathā vidyādharottamāḥ / ye ca rūpavratā lokā āvahe te pratiṣṭhitāḥ // 137 [AbhT_8.137] mahāvahe tvīśakṛtāḥ prajāhitakarāmbudāḥ / mahāparivahe meghāḥ kapālotthā maheśituḥ // 138 [AbhT_8.138] mahāparivahānto@yamṛtarddheḥ prāṅmarutpathaḥ / agnikanyā mātaraśca rudraśaktyā tvadhiṣṭhitāḥ // 139 [AbhT_8.139] dvitīye tatpare siddhacāraṇā nijakarmajāḥ / turye devāyudhānyaṣṭau diggajāḥ pañcame punaḥ // 140 [AbhT_8.140] ṣaṣṭhe garutmānanyasmiṅgaṅgānyatra vṛṣo vibhuḥ / dakṣastu navame brahmaśaktyā samadhiti[ni]ṣṭhitaḥ // 141 [AbhT_8.141] daśame vasavo rudrā ādityāśca marutpathe / navayojanasāhasro vigraho@rkasya maṇḍalam // 142 [AbhT_8.142] triguṇaṃ jñānaśaktiḥ sā tapatyarkatayā prabhoḥ / svarlokastu bhuvarlokāddhruvāntaṃ paribhāṣyate // 143 [AbhT_8.143] sūryāllakṣeṇa śītāṃśuḥ kriyāśaktiḥ śivasya sā / candrāllakṣeṇa nākṣatraṃ tato lakṣadvayena tu // 144 [AbhT_8.144] pratyekaṃ bhaumataḥ sūryasutānte pañcakaṃ viduḥ / saurāllakṣeṇa saptarṣivargastasmāddhruvastathā // 145 [AbhT_8.145] brahmaivāpararūpeṇa brahmasthāne dhruvo@calaḥ / medhībhūto vimānānāṃ sarveṣāmupari dhruvaḥ // 146 [AbhT_8.146] atra baddhāni sarvāṇyapyūhyante@nilamaṇḍale / svassapta mārutaskandhā āmeghādyāḥ pradhānataḥ // 147 [AbhT_8.147] itaśca kratuhotrādi kṛtvā jñānavivarjitāḥ / svaryānti tatkṣaye lokaṃ mānuṣyaṃ puṇyaśeṣataḥ // 148 [AbhT_8.148] evaṃ bhūmerdhruvāntaṃ syāllakṣāṇi daśa pañca ca / dve koṭī pañca cāśītirlakṣāṇi svargato mahān // 149 [AbhT_8.149] mārkaṇḍādyā ṛṣimunisiddhāstatra pratiṣṭhitāḥ / nivartitādhikārāśca devā mahati saṃsthitāḥ // 150 [AbhT_8.150] mahāntarāle tatrānye tvadhikārabhujo janāḥ / aṣṭau koṭyo mahallokājjano@tra kapilādayaḥ // 151 [AbhT_8.151] tiṣṭhanti sādhyāstatraiva bahavaḥ sukhabhāginaḥ / janāttaporkakoṭyo@tra sanakādyā mahādhiyaḥ // 152 [AbhT_8.152] prajāpatīnāṃ tatrādhikāro brahmātmajanmanām / brahmālayastu tapasaḥ satyaḥ ṣoḍaśa koṭayaḥ // 153 [AbhT_8.153] tatra sthitaḥ sa svayambhūrviśvamāviṣkarotyadaḥ / satye vedāstathā cānye karmadhyānena bhāvitāḥ // 154 [AbhT_8.154] ānandaniṣṭhāstatrordhvekoṭirvairiñcamāsanam / brahmāsanātkoṭiyugmaṃ puraṃ viṣṇornirūpitam // 155 [AbhT_8.155] dhyānapūjājapairviṣṇorbhaktā gacchanti tatpadam / vaiṣṇavātsaptakoṭībhirbhuvanaṃ parameśituḥ // 156 [AbhT_8.156] rudrasya sṛṣṭisaṃhārakarturbrahmāṇḍavartmani / dīkṣājñānavihīnā ye liṅgārādhanatatparāḥ // 157 [AbhT_8.157] te yāntyaṇḍāntare raudraṃ puraṃ nādhaḥ kadācana / tatsthāḥ sarve śivaṃ yānti rudrāḥ śrīkaṇṭhadīkṣitāḥ // 158 [AbhT_8.158] adhikārakṣaye sākaṃ rudrakanyāgaṇena te / puraṃ puraṃ ca rudrordhvamuttarottaravṛddhitaḥ // 159 [AbhT_8.159] brahmāṇḍādhaśca rudrordhva daṇḍapāṇeḥ puraṃ sa ca / śivecchayā dṛṇātyaṇḍaṃ mokṣamārga karoti ca // 160 [AbhT_8.160] śarvarudrau bhīmabhavāvugro devo mahānatha / īśāna iti bhūrlokāt sapta lokeśvarāḥ śivāḥ // 161 [AbhT_8.161] sthūlairviśeṣairārabdhāḥ sapta lokāḥ pare punaḥ / sūkṣmairiti guruścaiva rurau samyaṅnyarūpayat // 162 [AbhT_8.162] ye brahmaṇādisarge svaśarīrānnirmitāḥ prabhūtākhyāḥ / sthūlāḥ pañca viśeṣāḥ saptāmī tanmayā lokāḥ // 163 [AbhT_8.163] parato liṅgādhāraiḥ sūkṣmaistanmātrajairmahābhūtaiḥ / lokānāmāvaraṇairviṣṭabhya parasperaṇa gandhādyaiḥ // 164 [AbhT_8.164] kālāgnerdaṇḍapāṇyantamaṣṭānavatikoṭayaḥ / ata ūrdhvaṃ kaṭāho@ṇḍe sa ghanaḥ koṭiyojanam // 165 [AbhT_8.165] pañcāśatkoṭayaścordhvaṃ bhūpṛṣṭhādadharaṃ tathā / evaṃ koṭiśataṃ bhūḥ syāt sauvarṇastaṇḍulastataḥ // 166 [AbhT_8.166] śatarudrāvadhirhuphaṭ bhedayettattu duḥśamam / pratidikkaṃ daśa daśetyevaṃ rudraśataṃ bahiḥ // 167 [AbhT_8.167] brahmāṇḍādhārakaṃ tacca svaprabhāveṇa sarvataḥ / aṇḍasvarūpaṃ gurubhiścoktaṃ śrīrauravādiṣu // 168 [AbhT_8.168] vyakterabhimukhībhūtaḥ pracyutaḥ śaktirūpataḥ / āvāpavānanirbhakto vastupiṇḍo@ṇḍa ucyate // 169 [AbhT_8.169] tamoleśānuviddhasya kapālaṃ sattvamuttaram / rajo@nuviddhaṃ nirmṛṣṭaṃ sattvamasyādharaṃ tamaḥ // 170 [AbhT_8.170] vastupiṇḍa iti proktaṃ śivaśaktisamūhabhāk / aṇḍaḥ syāditi tadvyaktau saṃmukhībhāva ucyate // 171 [AbhT_8.171] tathāpi śivamagnānāṃ śaktīnāmaṇḍatā bhavet / tadartha vākyamaparaṃ tā hi na cyutaśaktitaḥ // 172 [AbhT_8.172] tanvakṣādau mā prasāṅkṣīdaṇḍateti padāntaram / tanvakṣādiṣu naivāste kasyāpyāvāpanaṃ yataḥ // 173 [AbhT_8.173] tanvakṣasamudāyatve kathamekatvamityataḥ / anirbhakta iti proktaṃ sājātyaparidarśakam // 174 [AbhT_8.174] vināpi vastupiṇḍākhyapadenaikaikaśo bhavet / tattveṣvaṇḍasvabhāvatvaṃ nanvevamapi kiṃ na tat // 175 [AbhT_8.175] guṇatanmātrabhūtaughamaye tattve prasajyate / ucyate vastuśabdena tanvakṣabhuvanātmakam // 176 [AbhT_8.176] rūpamuktaṃ yatastena tatsamūho@ṇḍa ucyate / bhavecca tatsamūhatvaṃ patyurviśvavapurbhṛtaḥ // 177 [AbhT_8.177] tadartha bhedakānyanyānyupāttānīti darśitam / tāvanmātrāsvavasthāsu māyādhīne@dhvamaṇḍale // 178 [AbhT_8.178] mā bhūdaṇḍatvamityāhuranye bhedakayojanam / itthamuktaviriñcāṇḍamṛto rudrāḥ śataṃ hi yat // 179 [AbhT_8.179] teṣāṃ sve patayo rudrā ekādaśa mahārciṣaḥ / ananto@tha kapālyāgniryamanairṛtakau balaḥ // 180 [AbhT_8.180] śīghro nidhīśo vidyeśaḥ śambhuḥ savīrabhadrakaḥ / madhu madhukṛtaḥ kadambaṃ kesarajālāni yadvadāvṛṇate // 181 [AbhT_8.181] tadvatte śivarudrā brahmāṇḍamasaṃkhyaparivārāḥ / śarāṣṭaniyutaṃ koṭirityeṣāṃ sanniveśanam // 182 [AbhT_8.182] śrīkaṇṭhādhiṣṭhitāste ca sṛjanti saṃharanti ca / īśvaratvaṃ diviṣadāmiti rauravavārtike // 183 [AbhT_8.183] siddhātantre tu hemāṇḍācchatakoṭerbahiḥ śatam / aṇḍānāṃ kramaśo dvidviguṇaṃ rūpyādiyojitam // 184 [AbhT_8.184] teṣu krameṇa brahmāṇaḥ saṃsyurdviguṇajīvitāḥ / kṣīyante kramaśaste ca tadante tattvamammayam // 185 [AbhT_8.185] dharāto@tra jalādi syāduttarottarataḥ kramāt / daśadhāhaṅkṛtāntaṃ dhīstasyāḥ syācchatadhā tataḥ // 186 [AbhT_8.186] sahasradhā vyaktamataḥ pauṃsnaṃ daśasahasradhā / niyatirlakṣadhā tasmāttasyāstu daśalakṣadhā // 187 [AbhT_8.187] kalāntaṃ koṭidhā tasmānmāyā viddaśakoṭidhā / īśvaraḥ śatakoṭiḥ syāttasmātkoṭisahasradhā // 188 [AbhT_8.188] sādākhyaṃ vyaśnute tacca śaktirvṛndena saṃkhyayā / vyāpinī sarvamadhvānaṃ vyāpyadevī vyavasthitā // 189 [AbhT_8.189] aprameyaṃ tataḥ śuddhaṃ śivatattvaṃ paraṃ viduḥ / jalādeḥ śivatattvāntaṃ na dṛṣṭaṃ kenacicchivāt // 190 [AbhT_8.190] ṛte tataḥ śivajñānaṃ paramaṃ mokṣakāraṇam / tathā cāha mahādevaḥ śrīmatsvacchandaśāsane // 191 [AbhT_8.191] nānyathā mokṣamāyāti paśurjñānaśatairapi / śivajñānaṃ na bhavati dīkṣāmaprāpya śāṅkarīm // 192 [AbhT_8.192] prāktanī pārameśī sā pauruṣeyī ca sā punaḥ / śatarudrordhvato bhadrakālyā nīlaprabhaṃ jayam // 193 [AbhT_8.193] na yajñadānatapasā prāpyaṃ kālyāḥ puraṃ jayam / tadbhaktāstatra gacchanti tanmaṇḍalasudīkṣitāḥ // 194 [AbhT_8.194] nirbījadīkṣayā mokṣaṃ dadāti parameśvarī / vidyeśāvaraṇe dīkṣāṃ yāvatīṃ kurute nṛṇām // 195 [AbhT_8.195] tāvatīṃ gatimāyānti bhuvane@tra niveśitāḥ / tataḥ koṭyā vīrabhadro yugāntāgnisamaprabhaḥ // 196 [AbhT_8.196] vijayākhyaṃ puraṃ cāsya ye smaranto maheśvaram / jaleṣu maruṣu cāgnau śiraśchedena vā mṛtāḥ // 197 [AbhT_8.197] te yānti bodhamaiśānaṃ vīrabhadraṃ mahādyutim / vairabhadrordhvataḥ koṭirviṣkambhādvistṛtaṃ tridhā // 198 [AbhT_8.198] rudrāṇḍaṃ sālilaṃ tvaṇḍaṃ śakracāpākṛti sthitam / ā vīrabhadrabhuvanādbhadrakālyālayāttathā // 199 [AbhT_8.199] trayodaśabhiranyaiśca bhuvanairupaśobhitam / tato bhuvaḥ sahādreḥ pūrgandhatanmātradhāraṇāt // 200 [AbhT_8.200] mṛtā gacchanti tāṃ bhūmiṃ dharitryāḥ paramāṃ budhāḥ / abdheḥ puraṃ tatastvāpyaṃ rasatanmātradhāraṇāt // 201 [AbhT_8.201] tataḥ śriyaḥ puraṃ rudrakrīḍāvataraṇeṣvatha / prayāgādau śrīgirau ca viśeṣānmaraṇena tat // 202 [AbhT_8.202] sārasvataṃ puraṃ tasmācchabdabrahmavidāṃ padam / rudrocitāstā mukhyatvādrudrebhyo@nyāstathā sthitāḥ // 203 [AbhT_8.203] pureṣu bahudhā gaṅgā devādau śrīḥ sarasvatī / lakulādyamareśāntā aṣṭāvapsu surādhipāḥ // 204 [AbhT_8.204] tatastu taijasaṃ tattvaṃ śivāgneratra saṃsthitiḥ / te cainaṃ vahnimāyānti vāhnīṃ ye dhāraṇāṃ śritāḥ // 205 [AbhT_8.205] bhairavādiharīndvantaṃ taijase nāyakāṣṭakam / prāṇasya bhuvanaṃ vāyordaśadhā daśadhā tu tat // 206 [AbhT_8.206] dhyātvā tyaktvātha vā prāṇān kṛtvā tatraiva dhāraṇām / taṃ viśanti mahātmāno vāyubhūtāḥ khamūrtayaḥ // 207 [AbhT_8.207] bhīmādigayaparyantamaṣṭakaṃ vāyutattvagam / khatattve bhuvanaṃ vyomnaḥ prāpyaṃ tadvyomadhāraṇāt // 208 [AbhT_8.208] vastrāpadāntaṃ sthāṇvādi vyomatattve surāṣṭakam / adīkṣitā ye bhūteṣu śivatattvābhimāninaḥ // 209 [AbhT_8.209] jñānahīnā api prauḍhadhāraṇāste@ṇḍato bahiḥ / dharābdhitejo@nilakhapuragā dīkṣitāśca vā // 210 [AbhT_8.210] tāvatsaṃskārayogārthaṃ na paraṃ padamīhitum / tathāvidhāvatāreṣu mṛtāścāyataneṣu ye // 211 [AbhT_8.211] tatpadaṃ te samāsādya kramādyānti śivātmatām / punaḥ punaridaṃ coktaṃ śrīmaddevyākhyayāmale // 212 [AbhT_8.212] śrīkāmikāyāṃ kaśmīravarṇane coktavānvibhuḥ / sureśvarīmahādhāmni ye mriyante ca tatpure // 213 [AbhT_8.213] brāhmaṇādyāḥ saṅkarāntāḥ paśavaḥ sthāvarāntagāḥ / rudrajātaya evaite ityāha bhagavāñchivaḥ // 214 [AbhT_8.214] ākāśāvaraṇādūrdhvamahaṅkārādadhaḥ priye / tanmātrādimano@ntānāṃ purāṇi śivaśāsane // 215 [AbhT_8.215] pañcavarṇayutaṃ gandhatanmātramaṇḍalaṃ mahat / ācchādya yojanānekakoṭibhiḥ sthitamantarā // 216 [AbhT_8.216] evaṃ rasādimātrāṇāṃ maṇḍalāni svavarṇata / śarvo bhavaḥ paśupatirīśo bhīma iti kramāt // 217 [AbhT_8.217] tanmātreśā yadicchātaḥ śabdādyāḥ khādikāriṇaḥ / tataḥ sūryenduvedānāṃ maṇḍalāni vibhurmahān // 218 [AbhT_8.218] ugraścetyeṣu patayastebhyo@rkendū sayājakau / ityaṣṭau tanavaḥ śaṃbhoryāḥ parāḥ parikīrtitāḥ // 219 [AbhT_8.219] aparā brahmaṇo@ṇḍe tā vyāpya sarvaṃ vyavasthitāḥ / kalpe kalpe prasūyante dharādyāstābhya eva tu // 220 [AbhT_8.220] tato vāgādikarmākṣayuktaṃ karaṇamaṇḍalam / agnīndraviṣṇumitrāḥ sabrahmāṇasteṣu nāyakāḥ // 221 [AbhT_8.221] prakāśamaṇḍalaṃ tasmācchrutaṃ buddhyakṣapañcakam / digvidyudarkavaruṇabhuvaḥ śrotrādidevatāḥ // 222 [AbhT_8.222] prakāśamaṇḍalādūrdhvaṃ sthitaṃ pañcārthamaṇḍalam / manomaṇḍalametasmāt somenādhiṣṭhitaṃ yataḥ // 223 [AbhT_8.223] bāhyadeveṣvadhiṣṭhātā sāmyaiśvaryasukhātmakaḥ / manodevastato divyaḥ somo vibhurudīritaḥ // 224 [AbhT_8.224] tato@pi sakalākṣāṇāṃ yonerbuddhyakṣajanmanaḥ / sthūlādicchagalāntāṣṭayuktaṃ cāhaṅkṛteḥ puram // 225 [AbhT_8.225] buddhitattvaṃ tato devayonyaṣṭakapurādhipam / paiśācaprabhṛtibrāhmaparyantaṃ tacca kīrtitam // 226 [AbhT_8.226] etāni devayonīnāṃ sthānānyeva purāṇyataḥ / avatīryātmajanmānaṃ dhyāyantaḥ saṃbhavanti te // 227 [AbhT_8.227] parameśaniyogācca codyamānāśca māyayā / niyāmitā niyatyā ca brahmaṇo@vyaktajanmanaḥ // 228 [AbhT_8.228] vyajyante tena sargādau nāmarūpairanekadhā / svāṃśanaiva mahātmāno na tyajanti svaketanam // 229 [AbhT_8.229] uktaṃ ca śivatanāvidamadhikārapadasthitena guruṇā naḥ / aṣṭānāṃ devānāṃ śaktyāvirbhāvayonayo hyetāḥ // 230 [AbhT_8.230] tanubhogāḥ punareṣāmadhaḥ prabhūtātmakāḥ proktāḥ / catvāriṃśattulyopabhogadeśādhikāni bhuvanāni // 231 [AbhT_8.231] sādhanabhedātkevalamaṣṭakapañcakatayoktāni / etāni bhaktiyogaprāṇatyāgādigamyāni // 232 [AbhT_8.232] teṣūmāpatireva prabhuḥ svatantrendriyo vikaraṇātmā / taratamayogena tato@pi devayonyaṣṭakaṃ lakṣyaṃ tu // 233 [AbhT_8.233] lokānāmakṣāṇi ca viṣayaparicchittikaraṇāni / gandhādermahadantādekādhikyena jātamaiśvaryam // 234 [AbhT_8.234] aṇimādyātmakamasminpaiśācādye viriñcānte / jñātvaivaṃ śodhayedbuddhiṃ sārdhaṃ puryaṣṭakendriyaiḥ // 235 [AbhT_8.235] krodheśāṣṭakamānīlaṃ saṃvartādyaṃ tato viduḥ / tejoṣṭakaṃ balādhyakṣaprabhṛtikrodhanāṣtakāt // 236 [AbhT_8.236] akṛtādi tato buddhau yogāṣṭakamudāhṛtam / svacchandaśāsane tattu mūle śrīpūrvaśāsane // 237 [AbhT_8.237] yogāṣṭakapade yattu some śraikaṇṭhameva ca / tato māyāpuraṃ bhūyaḥ śrīkaṇṭhasya ca kathyate // 238 [AbhT_8.238] tena dvitīyaṃ bhuvanaṃ tayoḥ pratyekamucyate / tatra māyāpuraṃ devyā yayā viśvamadhiṣṭhitam // 239 [AbhT_8.239] pratikalpaṃ nāmabhedairbhaṇyate sā maheśvarī / umāpateḥ puraṃ paścānmātṛbhiḥ parivāritam // 240 [AbhT_8.240] śrīkaṇṭha eva parayā mūrtyomāpatirucyate / brāhmyaiśī skandajā hārī vārāhyaindrī saviccikā [carcikā] // 241 [AbhT_8.241] pītā śuklā pītanīle nīlā śuklāruṇā kramāt / agnīśasaumyayāmyāpyapūrvanairṛtagāstu tāḥ // 242 [AbhT_8.242] aṃśena mānuṣe loke dhātrā tā hyavatāritāḥ / svacchandāstāḥ parāścānyāḥ pare vyomni vyavasthitāḥ // 243 [AbhT_8.243] svacchandaṃ tā niṣevante saptadheyamumā yataḥ / umāpatipurasyordhva sthitaṃ mūrtyaṣṭakaṃ param // 244 [AbhT_8.244] śarvādikaṃ yasya sṛṣṭirdharādyā yājakāntataḥ / tābhya īśānamūrtiryā sā merau saṃpratiṣṭhitā // 245 [AbhT_8.245] śrīkaṇṭhaḥ sphaṭikādrau sā vyāptā tanvaṣṭakairjagat / ye yogaṃ saguṇaṃ śambhoḥ saṃyatāḥ paryupāsate // 246 [AbhT_8.246] tanmaṇḍalaṃ vā dṛṣṭvaiva muktadvaitā hṛtatrayāḥ / guṇānāmādharauttaryācchuddhāśuddhatvasaṃsthiteḥ // 247 [AbhT_8.247] tāratamyācca yogasya bhedātphalavicitratā / tato bhogaphalāvāptibhedādbhedo@yamucyate // 248 [AbhT_8.248] mūrtyaṣṭakopariṣṭāttu suśivā dvādaśoditāḥ / vāmādyekaśivāntāste kuṅkumābhāḥ sutejasaḥ // 249 [AbhT_8.249] tadūrdhva vīrabhadrākhyo maṇḍalādhipatiḥ sthitaḥ / yatta [sta] tsāyujyamāpannaḥ sa tena saha modate // 250 [AbhT_8.250] tato@pyaṅguṣṭhamātrāntaṃ mahādevāṣṭakaṃ bhavet / buddhitattvamidaṃ proktaṃ devayonyaṣṭakāditaḥ // 251 [AbhT_8.251] mahādevāṣṭakānte tad yogāṣṭakamihoditam / tatra śraikaṇṭhamuktaṃ yat tasyaivomāpatistathā // 252 [AbhT_8.252] mūrtayaḥ suśivā vīro mahādevāṣṭakaṃ vapuḥ / upariṣṭāddhiyo@dhaśca prakṛterguṇasaṃjñitam // 253 [AbhT_8.253] tattvaṃ tatra tu saṃkṣubdhā guṇāḥ prasuvate dhiyam / na vaiṣamyamanāpannaṃ kāraṇaṃ kāryasūtaye // 254 [AbhT_8.254] guṇasāmyatmikā tena prakṛtiḥ kāraṇaṃ bhavet / nanvevaṃ sāpi saṃkṣobhaṃ vinā tānviṣamānguṇān // 255 [AbhT_8.255] kathaṃ suvīta tatrādye kṣobhe syādanavasthitiḥ / sāṃkhyasya doṣa evāyaṃ yadi vā tena te guṇāḥ // 256 [AbhT_8.256] avyaktamiṣṭāḥ sāmyaṃ tu saṅgamātraṃ na cetarat / asmākaṃ tu svatantreśatathecchākṣobhasaṃgatam // 257 [AbhT_8.257] avyaktaṃ buddhitattvasya kāraṇaṃ kṣobhitā guṇāḥ / nanu tattveśvarecchāto yaḥ kṣobhaḥ prakṛteḥ purā // 258 [AbhT_8.258] tadeva buddhitattvaṃ syāt kimanyaiḥ kalpitairguṇaiḥ / naitatkāraṇatārūpaparāmarśāvarodhi yat // 259 [AbhT_8.259] kṣobhāntaraṃ tataḥ kārya bījocchūnāṅkurādivat / kramāttamorajaḥsattve gurūṇāṃ paṅktayaḥ sthitāḥ // 260 [AbhT_8.260] tisro dvātriṃśadekātastriṃśadapyekaviṃśatiḥ / svajñanayogabalataḥ krīḍanto daiśikottamāḥ // 261 [AbhT_8.261] trinetrāḥ pāśanirmuktāste@trānugrahakāriṇaḥ / buddheśca guṇaparyantamubhe saptādhike śate // 262 [AbhT_8.262] rudrāṇāṃ bhuvanānāṃ ca mukhyato@nye tadantare / yogāṣṭakaṃ guṇaskandhe proktaṃ śivatanau punaḥ // 263 [AbhT_8.263] yonīratītya gauṇe skandhe syuryogadātāraḥ / akṛtakṛtavibhuviriñcā harirguhaḥ kramavaśāttato devī // 264 [AbhT_8.264] karaṇānyaṇimādiguṇāḥ kāryāṇi pratyayaprapañcaśca / avyaktādutpannā guṇāśca sattvādayo@mīṣām // 265 [AbhT_8.265] dharmajñānavirāgānaiśvaryaṃ tatphalāni vividhāni / yacchanti guṇebhyo@mī puruṣebhyo yogadātāraḥ // 266 [AbhT_8.266] tebhyaḥ parato bhuvanaṃ sattvādiguṇāsanasya devasya / sakalajagadekamāturbhartuḥ śrīkaṇṭhanāthasya // 267 [AbhT_8.267] yenomāguhanīlabrahmaṛbhukṣakṛtākṛtādibhuvaneṣu / graharūpiṇyā śaktyā prābhvyādhiṣṭhāni bhūtāni // 268 [AbhT_8.268] upasaṃjihīrṣuriha yaścaturānanapaṅkajaṃ samāviśya / dagdhvā caturo lokāñjanalokānnirmiṇoti punaḥ // 269 [AbhT_8.269] yasyecchātaḥ sattvādiguṇaśarīrā visṛjati rudrāṇī / anukalpo rudrāṇyā vedī tatrejyate@nukalpena // 270 [AbhT_8.270] paśupatirindropendraviriñcairatha tadupalambhato devaiḥ / gandharvayakṣarākṣasapitṛmunibhiścitritāstathā yāgāḥ // 271 [AbhT_8.271] guṇānāṃ yatparaṃ sāmyaṃ tadavyaktaṃ guṇordhvataḥ / krodheśacaṇḍasaṃvartā jyotiḥpiṅgalasūrakau // 272 [AbhT_8.272] pañcāntakaikavīrau ca śikhodaścāṣṭa tatra te / gahanaṃ puruṣanidhānaṃ prakṛtirmūlaṃ pradhānamavyaktam // 273 [AbhT_8.273] guṇakāraṇamityete māyāprabhavasya paryāyāḥ / yāvantaḥ kṣetrajñāḥ sahajāgantukamalopadigdhacitaḥ // 274 [AbhT_8.274] te sarve@tra vinihitā rudrāśca tadutthabhogabhujaḥ / mūḍhavivṛttavilīnaiḥ karaṇaiḥ kecittu vikaraṇakāḥ // 275 [AbhT_8.275] akṛtādhiṣṭhānatayā kṛtyāśaktāni mūḍhāni / pratiniyataviṣayabhāñji sphuṭāni śāstre vivṛttāni // 276 [AbhT_8.276] bhagnāni mahāpralaye sṛṣṭau notpāditāni līnāni / icchādhīnāni punarvikaraṇasaṃjñāni kāryamapyevam // 277 [AbhT_8.277] puṃstattve tuṣṭinavakaṃ siddhayo@ṣṭau ca tatpuraḥ / tāvatya evāṇimādibhuvanāṣṭakameva ca // 278 [AbhT_8.278] atattve tattvabuddhyā yaḥ santoṣastuṣṭiratra sā / heye@pyādeyadhīḥ siddhiḥ tathā coktaṃ hi kāpilaiḥ // 279 [AbhT_8.279] ādhyātmikāścatasraḥ prakṛtyupādānakālabhāgyākhyāḥ / pañca viṣayoparamato@rjanarakṣāsaṅgasaṃkṣayavighātaiḥ // 280 [AbhT_8.280] ūhaḥ śabdo@dhyayanaṃ duḥkhavighātāstrayaḥ suhṛtprāptiḥ / dānaṃ ca siddhayo@ṣṭau siddheḥ pūrvo@ṅkuśastrividhaḥ // 281 [AbhT_8.281] aṇimādyūrdhvatastisraḥ paṅktayo guruśiṣyagāḥ / tatrāpi triguṇacchāyāyogāt tritvamudāhṛtam // 282 [AbhT_8.282] nāḍīvidyāṣṭakaṃ cordhvaṃ paṅktīnāṃ syādiḍādikam / puṃsi nādamayī śaktiḥ prasarākhyā ca yatsthitā // 283 [AbhT_8.283] na hyakartā pumānkartuḥ kāraṇatvaṃ ca saṃsthitam / akartaryapi vā puṃsi sahakāritayā sthite // 284 [AbhT_8.284] śeṣakāryātmataiṣṭavyānyathā satkāryahānitaḥ / tasmāttathāvidhe kārye yā śaktiḥ puruṣasya sā // 285 [AbhT_8.285] tāvanti rūpāṇyādāya pūrṇatāmadhigacchati / nāḍyaṣṭakordhve kathitaṃ vigrahāṣṭakamucyate // 286 [AbhT_8.286] kāryaṃ heturduḥkhaṃ sukhaṃ ca vijñānasādhyakaraṇāni / sādhanamiti vigrahatāyugaṣṭakaṃ bhavati puṃstattve // 287 [AbhT_8.287] bhuvanaṃ dehadharmāṇāṃ daśānāṃ vigrahāṣṭakāt / ahiṃsā satyamasteyaṃ brahmākalkākrudho guroḥ // 288 [AbhT_8.288] śuśrūṣāśaucasantoṣā ṛjuteti daśoditāḥ / puṃstattva eva gandhāntaṃ sthitaṃ ṣoḍaśakaṃ punaḥ // 289 [AbhT_8.289] ārabhya dehapāśākhyaṃ puraṃ buddhiguṇāstataḥ / tatraivāṣṭāvahaṃkārastridhā kāmādikāstathā // 290 [AbhT_8.290] pāśā āgantukagāṇeśavaidyeśvarabheditāḥ / trividhāste sthitāḥ puṃsi mokṣamārgoparodhakāḥ // 291 [AbhT_8.291] yatkiṃcitparamādvaitasaṃvitsvātantryasundarāt / parācchivāduktarūpādanyattatpāśa ucyate // 292 [AbhT_8.292] tadevaṃ puṃstvamāpanne pūrṇe@pi parameśvare / tatsvarūpāparijñānaṃ citraṃ hi puruṣāstataḥ // 293 [AbhT_8.293] uktānuktāstu ye pāśāḥ paratantroktalakṣaṇāḥ / te puṃsi sarve tāṃstatra śodhayanmucyate bhavāt // 294 [AbhT_8.294] puṃsa ūrdhva tu niyatistatrasthāḥ śaṃkarā daśa / hemābhāḥ susitāḥ kālatattve tu daśa te śivāḥ // 295 [AbhT_8.295] koṭiḥ ṣoḍaśasāhasraṃ pratyekaṃ parivāriṇaḥ / rāge vīreśabhuvanaṃ gurvantevāsināṃ puram // 296 [AbhT_8.296] puraṃ cāśuddhavidyāyāṃ syācchaktinavakojjvalam / manonmanyantagāstāśca vāmādyāḥ parikīrtitāḥ // 297 [AbhT_8.297] kalāyāṃ syānmahādevatrayasya puramuttamam / tato māyā tripuṭikā mukhyato@nantakoṭibhiḥ // 298 [AbhT_8.298] ākrāntā sā bhagabilaiḥ proktaṃ śaivyāṃ tanau punaḥ / aṅguṣṭhamātraparyantaṃ mahādevāṣṭakaṃ niśi // 299 [AbhT_8.299] cakrāṣṭakādhipatyena tathā śrīmālinīmate / vāmādyāḥ puruṣādau ye proktāḥ śrīpūrvaśāsane // 300 [AbhT_8.300] te māyātattva evoktāstanau śaivyāmanantataḥ / kapālavratinaḥ svāṅgahotāraḥ kaṣṭatāpasāḥ // 301 [AbhT_8.301] sarvābhayāḥ khaḍgadhārāvratāstattattvavedinaḥ / kramāttattattvamāyānti yatreśo@nanta ucyate // 302 [AbhT_8.302] uktaṃ ca tasya parataḥ sthānamanantādhipasya devasya / sthitivilayasargakarturguhābhagadvārapālasya // 303 [AbhT_8.303] dharmānaṇimādiguṇāñjñānāni tapaḥsukhāni yogāṃśca / māyābilātpradatte puṃsāṃ niṣkṛṣya niṣkṛṣya // 304 [AbhT_8.304] tacchaktīddhasvabalā guhādhikārāndhakāraguṇadīpāḥ / sarve@nantapramukhā dīpyante śatabhavapramukhāntāḥ // 305 [AbhT_8.305] so@vyaktamadhiṣṭhāya prakaroti jaganniyogataḥ śambhoḥ / śuddhāśuddhasroto@dhikārahetuḥ śivo yasmāt // 306 [AbhT_8.306] śivaguṇayoge tasmin mahati pade ye pratiṣṭhitāḥ prathamam / te@nantāderjagataḥ sargasthitivilayakartāraḥ // 307 [AbhT_8.307] māyābilamidamuktaṃ paratastu guhā jagadyoniḥ / utpattyā teṣvasyāḥ patiśaktikṣobhamanuvidhīyamāneṣu // 308 [AbhT_8.308] yonivivareṣu nānākāmasamṛddheṣu bhagasaṃjñā / kāmayate patirenāmicchānuvidhāyinīṃ yadā devīm // 309 [AbhT_8.309] pratibhagamavyaktādyāḥ prajāstadāsyāḥ prajāyante / teṣāmatisūkṣmāṇāmetāvattvaṃ na varṇyate vidhiṣu // 310 [AbhT_8.310] avavarakāṇyekasminyadvatsāle bahūni baddhāni / yonibilānyekasmiṃstadvanmāyāśiraḥsāle // 311 [AbhT_8.311] māyāpaṭalaiḥ sūkṣmaiḥ kuḍyaiḥ pihitāḥ parasparamadṛśyāḥ / nivasanti tatra rudrāḥ sukhinaḥ pratibilamasaṃkhyātāḥ // 312 [AbhT_8.312] sthāne sāyujyagatāḥ sāmīpyagatāḥ pare salokasthāḥ / pratibhuvanamevamayaṃ nivāsināṃ gurubhiruddiṣṭaḥ // 313 [AbhT_8.313] api sarvasiddhavācaḥ kṣīyerandīrghakālamudgīrṇāḥ / na punaryonyānantyāducyante srotasāṃ saṃkhyāḥ // 314 [AbhT_8.314] tasmānnirayādyekaṃ yatproktaṃ dvārapālaparyantam / srotastenānyānyapi tulyavidhānāni vedyāni // 315 [AbhT_8.315] avyaktakale guhayā prakṛtikalābhyāṃ vikāra ātmīyaḥ / otaḥ proto vyāptaḥ kalitaḥ pūrṇaḥ parikṣiptaḥ // 316 [AbhT_8.316] madhye puṭatrayaṃ tasyā rudrāḥ ṣaḍadhare@ntare / eka ūrdhve ca pañceti dvādaśaite nirūpitāḥ // 317 [AbhT_8.317] gahanāsādhyau hariharadaśeśvarau trikalagopatī ṣaḍime / madhye@nantaḥ kṣemo dvijeśavidyeśaviśvaśivāḥ // 318 [AbhT_8.318] iti pañca teṣu pañcasu ṣaṭsu ca puṭageṣu tatparāvṛttyā / parivarttate sthitiḥ kila devo@nantastu sarvathā madhye // 319 [AbhT_8.319] ūrdhvādharagakapālakapuṭaṣaṭkayugena tatparāvṛttyā / madhyato@ṣṭābhirdiksthairvyāpto granthirmataṅgaśāstroktaḥ // 320 [AbhT_8.320] śrīsāraśāsane punareṣā ṣaṭpuṭatayā vinirdiṣṭā / granthyākhyamidaṃ tattvaṃ māyākāryaṃ tato māyā // 321 [AbhT_8.321] māyātattvaṃ vibhu kila gahanamarūpaṃ samastavilayapadam / tatra na bhuvanavibhāgo yukto granthāvasau tasmāt // 322 [AbhT_8.322] māyātattvādhipatiḥ so@nantaḥ samuditānvicāryāṇūn / yugapatkṣobhayati niśāṃ sā sūte saṃpuṭairanantaiḥ svaiḥ // 323 [AbhT_8.323] tena kalādidharāntaṃ yaduktamāvaraṇajālamakhilaṃ tat / niḥsaṃkhyaṃ ca vicitraṃ māyaivaikā tvabhinneyam // 324 [AbhT_8.324] uktaṃ śrīpūrvaśāstre ca dharāvyaktātmakaṃ dvayam / asaṃkhyātaṃ niśāśaktisaṃjñaṃ tvekasvarūpakam // 325 [AbhT_8.325] pāśāḥ puroktāḥ praṇavāḥ pañcamānāṣṭakaṃ muneḥ / kulaṃ yoniśca vāgīśī yasyāṃ jāto na jāyate // 326 [AbhT_8.326] dīkṣākāle@dharādhvasthaśuddhau yaccādharādhvagam / anantasya samīpe tu tatsarvaṃ pariniṣṭhitam // 327 [AbhT_8.327] sādhyo dātā damano dhyāno bhasmeti bindavaḥ pañca / pañcārthaguhyarudrāṅkuśahṛdayalakṣaṇaṃ ca savyūham // 328 [AbhT_8.328] ākarṣādarśau cetyaṣṭakametatpramāṇānām / aluptavibhavāḥ sarve māyātattvādhikāriṇaḥ // 329 [AbhT_8.329] māyāmayaśarīrāste bhogaṃ svaṃ paribhuñjate / pralayānte hyanantena saṃhṛtāste tvaharmukhe // 330 [AbhT_8.330] anyānantaprasādena vibudhā api taṃ param / suptabuddhaṃ manyamānāḥ svatantrammanyatājaḍāḥ // 331 [AbhT_8.331] svātmānameva jānanti hetuṃ māyāntarālagāḥ / ataḥ paraṃ sthitā māyā devī jantuvimohinī // 332 [AbhT_8.332] devadevasya sā śaktiratidurghaṭakāritā / nirvairaparipanthinyā tayā bhramitabuddhayaḥ // 333 [AbhT_8.333] idaṃ tattvamidaṃ neti vivadantīha vādinaḥ / gurudevāgniśāstreṣu ye na bhaktā narādhamāḥ // 334 [AbhT_8.334] satpathaṃ tānparityājya sotpathaṃ nayati dhruvam / asadyuktivicārajñāñchuṣkatarkāvalambinaḥ // 335 [AbhT_8.335] bhramayatyeva tānmāyā hyamokṣe mokṣalipsayā / śivadīkṣāsinā cchinnā śivajñānāsinā tathā // 336 [AbhT_8.336] na prarohetpunarnānyo hetustacchedanaṃ prati / mahāmāyordhvataḥ śuddhā mahāvidyātha mātṛkā // 337 [AbhT_8.337] vāgīśvarī ca tatrasthaṃ vāmādinavasatpuram / vāmā jyeṣṭhā raudrī kālī kalavikaraṇībalavikārike tathā // 338 [AbhT_8.338] mathanī damanī manonmanī ca tridṛśaḥ pītāḥ samastāstāḥ / saptakoṭyo mukhyamantrā vidyātattve@tra saṃsthitāḥ // 339 [AbhT_8.339] ekaikārbudalakṣāṃśāḥ padmākārapurā iha / vidyārājñyastriguṇyādyāḥ sapta saptārbudeśvarāḥ // 340 [AbhT_8.340] vidyātattvordhvamaiśaṃ tu tattvaṃ tatra kramordhvagam / śikhaṇḍyādyamanantāntaṃ purāṣṭakayutaṃ puram // 341 [AbhT_8.341] śikhaṇḍī śrīgalo mūrtirekanetraikarudrakau / śivottamaḥ sūkṣmarudro@nanto vidyeśvarāṣṭakam // 342 [AbhT_8.342] kramādūrdhvordhvasaṃsthānaṃ saptānāṃ nāyako vibhuḥ / ananta eva dhyeyaśca pūjyaścāpyuttarottaraḥ // 343 [AbhT_8.343] mukhyamantreśvarāṇāṃ yat sārdhaṃ koṭitrayaṃ sthitam / tannāyakā ime tena vidyeśāścakravartinaḥ // 344 [AbhT_8.344] uktaṃ ca gurubhiritthaṃ śivatanvādyeṣu śāsaneṣvetat / bhagabilaśatakalitaguhāmūrdhāsanago@ṣṭaśaktiyugdevaḥ // 345 [AbhT_8.345] gahanādyaṃ nirayāntaṃ sṛjati ca rudrāṃśca viniyuṅkte / uddharati manonmanyā puṃsasteṣveva bhavati madhyasthaḥ // 346 [AbhT_8.346] te tenodastacitaḥ paratattvālocane@bhiniviśante / sa punaradhaḥ pathavartiṣvadhikṛta evāṇuṣu śivena // 347 [AbhT_8.347] avasitapativiniyogaḥ sārdhamanekātmamantrakoṭībhiḥ / nirvātyanantanāthastaddhāmāviśati sūkṣmarudrastu // 348 [AbhT_8.348] anugṛhyāṇumapūrvaṃ sthāpayati patiḥ śikhaṇḍinaḥ sthāne / ityaṣṭau paripāṭyā yāvaddhāmāni yāti gururekaḥ // 349 [AbhT_8.349] tāvadasaṃkhyātānāṃ jantūnāṃ nirvṛtiṃ kurute / te@ṣṭāvapi śaktyaṣṭakayogāmalajalaruhāsanāsīnāḥ // 350 [AbhT_8.350] ālokayanti devaṃ hṛdayasthaṃ kāraṇaṃ paramam / taṃ bhagavantamanantaṃ dhyāyantaḥ svahṛdi kāraṇaṃ śāntam // 351 [AbhT_8.351] saptānudhyāyantyapi mantrāṇāṃ koṭayaḥ śuddhāḥ / māyādiravīcyanto bhavastvanantādirucyate@pyabhavaḥ // 352 [AbhT_8.352] śivaśuddhaguṇādhīkārāntaḥ so@pyeṣa heyaśca / atrāpi yato dṛṣṭānugrāhyāṇāṃ niyojyatā śaivī // 353 [AbhT_8.353] iṣṭā ca tannivṛttirhyabhavastvadhare na bhūyate yasmāt / patyurapasarpati yataḥ kāraṇatā kāryatā ca siddhebhyaḥ // 354 [AbhT_8.354] kañcukavacchivasiddhau tāvatibhavasaṃjñayātimadhyasthau / dharmajñānavirāgaiśyacatuṣṭayapuraṃ tu yat // 355 [AbhT_8.355] rūpāvaraṇasaṃjñaṃ tattattve@sminnaiśvare viduḥ / vāmā jyeṣṭhā ca raudrīti bhuvanatrayaśobhitam // 356 [AbhT_8.356] sūkṣmāvaraṇamākhyātamīśatattve gurūttamaiḥ / aiśātsādāśivaṃ jñānakriyāyugalamaṇḍitam // 357 [AbhT_8.357] śuddhāvaraṇamityāhuruktā śuddhāvṛteḥ param / vidyāvṛtistato bhāvābhāvaśaktidvayojjvalā // 358 [AbhT_8.358] śaktyāvṛtiḥ pramāṇākhyā tataḥ śāstre nirūpitā / śaktyāvṛtestu tejasvidhruveśābhyāmalaṅkṛtam // 359 [AbhT_8.359] tejasvyāvaraṇaṃ vedapurā mānāvṛtistataḥ / mānāvṛteḥ suśuddhāvṛtpuratritayaśobhitā // 360 [AbhT_8.360] suśuddhāvaraṇādūrdhva śaivamekapuraṃ bhavet / śivāvṛterūrdhvamāhurmokṣāvaraṇasaṃjñitam // 361 [AbhT_8.361] asyāṃ mokṣāvṛtau rudrā ekādaśa nirūpitāḥ / mokṣāvaraṇatastvekapuramāvaraṇaṃ dhruvam // 362 [AbhT_8.362] ūrdhve dhruvāvṛtericchāvaraṇaṃ tatra te śivāḥ / īśvarecchāgṛhāntasthāstatpuraṃ caikamucyate // 363 [AbhT_8.363] icchāvṛteḥ prabuddhākhyaṃ digrudrāṣṭakacarcitam / prabuddhāvaraṇādūrdhva samayāvaraṇaṃ mahat // 364 [AbhT_8.364] bhuvanaiḥ pañcabhirgarbhīkṛtānantasamāvṛti / sāmayātsauśivaṃ tatra sādākhyaṃ bhuvanaṃ mahat // 365 [AbhT_8.365] tasminsadāśivo devastasya savyāpasavyayoḥ / jñānakriye parecchā tu śaktirutsaṅgagāminī // 366 [AbhT_8.366] sṛṣṭyādipañcakṛtyāni kurute sa tayecchayā / pañca brahmāṇyaṅgaṣaṭkaṃ sakalādyaṣṭakaṃ śivāḥ // 367 [AbhT_8.367] daśāṣṭādaśa rudrāśca taireva suśivo vṛtaḥ / sadyo vāmāghorau puruṣeśau brahmapañcakaṃ hṛdayam // 368 [AbhT_8.368] mūrdhaśikhāvarmadṛgastramaṅgāni ṣaṭ prāhuḥ / sakalākalaśūnyaiḥ saha kalāḍhyakhamalaṅkṛte kṣapaṇamantyam // 369 [AbhT_8.369] kaṇṭhyauṣṭhyamaṣṭamaṃ kila sakalāṣṭakametadāmnātam / oṃ kāraśivau dīpto hetvīśadaśeśakau suśivakālau // 370 [AbhT_8.370] sūkṣmasutejaḥśarvāḥ śivāḥ daśaite@tra pūrvādeḥ / vijayo niḥśvāsaśca svāyambhuvo vahnivīrarauravakāḥ // 371 [AbhT_8.371] mukuṭavisarenduvinduprodgītā lalitasiddharudrau ca / santānaśivau parakiraṇapārameśā iti smṛtā rudrāḥ // 372 [AbhT_8.372] sarveṣāmeteṣāṃ jñānāni viduḥ svatulyanāmāni / mantramunikoṭiparivṛta matha vibhuvāmādirudratacchaktiyutam // 373 [AbhT_8.373] tārādiśaktijuṣṭaṃ suśivāsanamatisitakajamasaṃkhyadalam / yaḥ śaktirudravargaḥ parivāre viṣṭare ca suśivasya // 374 [AbhT_8.374] pratyekamasya nijanijaparivāre parārdhakoṭayo@saṃkhyāḥ / māyāmalanirmuktāḥ kevalamadhikāramātrasaṃrūḍhāḥ // 375 [AbhT_8.375] suśivāvaraṇe rudrāḥ sarvajñāḥ sarvaśaktisampūrṇāḥ / adhikārabandhavilaye śāntāḥ śivarūpiṇo punarbhavinaḥ // 376 [AbhT_8.376] ūrdhve bindvāvṛtirdīptā tatra tatra padmaṃ śaśiprabham / śāntyatītaḥ śivastatra tacchaktyutsaṅgabhūṣitaḥ // 377 [AbhT_8.377] nivṛttyādikalāvargaparivārasamāvṛtaḥ / asaṃkhyarudratacchaktipurakoṭibhirāvṛtaḥ // 378 [AbhT_8.378] śrīmanmataṅgaśāstre ca layākhyaṃ tattvamuttamam / pāribhāṣikamityetannāmnā bindurihocyate // 379 [AbhT_8.379] caturmūrtimayaṃ śubhraṃ yattatsakalaniṣkalam / tasminbhogaḥ samuddiṣṭa ityatredaṃ ca varṇitam // 380 [AbhT_8.380] nivṛttyādeḥ susūkṣmatvāddharādyārabdhadehatā / mātuḥ sphūrjanmahājñānalīnatvānna vibhāvyate // 381 [AbhT_8.381] udrikta taijasatvena hemno bhūparamāṇavaḥ / yathā pṛthaṅna bhāntyevamūrdhvādhorudradehagāḥ // 382 [AbhT_8.382] bindūrdhve@rdhenduretasya kalā jyotsnā ca tadvatī / kāntiḥ prabhā ca vimalā pañcaitā rodhikāstataḥ // 383 [AbhT_8.383] rundhanī rodhanī roddhrī jñānabodhā tamopahā / etāḥ pañca kalāḥ prāhurnirodhinyāṃ gurūttamāh // 384 [AbhT_8.384] ardhamātraḥ smṛto bindurvyomarūpī catuṣkalaḥ / tadardhamardhacandrastadaṣṭāṃśena nirodhikā // 385 [AbhT_8.385] hetūnbrahmādikān runddhe rodhikāṃ tāṃ tyajettataḥ / nirodhikāmimāṃ bhittvā sādākhyaṃ bhuvanaṃ param // 386 [AbhT_8.386] pararūpeṇa yatrāste pañcamantramahātanuḥ / ityardhendunirodhyantabindvāvṛtyūrdhvato mahān // 387 [AbhT_8.387] nādaḥ kiñjalkasadṛśo mahadbhiḥ puruṣairvṛtaḥ / catvāri bhuvanānyatra dikṣu madhye ca pañcamam // 388 [AbhT_8.388] indhikā dīpikā caiva rodhikā mocikordhvagā / madhye@tra padmaṃ tatrordhvagāmī tacchaktibhirvṛtaḥ // 389 [AbhT_8.389] nādordhvatastu sauṣumnaṃ tatra tacchaktibhṛtprabhuḥ / tadīśaḥ piṅgalelābhyāṃ vṛtaḥ savyāpasavyayoḥ // 390 [AbhT_8.390] yā prabhoraṅkagā devī suṣumnā śaśisaprabhā / grathito@dhvā tayā sarva ūrdhvaścādhastanastathā // 391 [AbhT_8.391] nādaḥsuṣumnādhārastu bhittvā viśvamidaṃ jagat / adhaḥśaktyā vinirgacchedūrdhvaśaktyā ca mūrdhataḥ // 392 [AbhT_8.392] nāḍyā brahmabile līnaḥ so@vyaktadhvanirakṣaraḥ / nadansarveṣu bhūteṣu śivaśaktyā hyadhiṣṭhitaḥ // 393 [AbhT_8.393] suṣumnordhve brahmabilasaṃjñayāvaraṇaṃ tridṛk / tatra brahmā sitaḥ śūlī pañcāsyaḥ śaśiśekharaḥ // 394 [AbhT_8.394] tasyotsaṅge parā devī brahmāṇī mokṣamārgagā / roddhrī dātrī ca mokṣasya tāṃ bhittvā cordhvakuṇḍalī // 395 [AbhT_8.395] śaktiḥ suptāhisadṛśī sā viśvādhāra ucyate / tasyāṃ sūkṣmā susūkṣmā ca tathānye amṛtāmite // 396 [AbhT_8.396] madhyato vyāpinī tasyāṃ vyāpīśo vyāpinīdharaḥ / śaktitattvamidaṃ yasya prapañco@yaṃ dharāntakaḥ // 397 [AbhT_8.397] śivatattvaṃ tatastatra caturdikkaṃ vyavasthitāḥ / vyāpī vyomātmako@nanto@nāthastacchaktibhāginaḥ // 398 [AbhT_8.398] madhye tvanāśritaṃ tatra devadevo hyanāśritaḥ / tacchaktyutsaṅgabhṛtsūryaśatakoṭisamaprabhaḥ // 399 [AbhT_8.399] śivatattvordhvataḥ śaktiḥ parā sā samanāhvayā / sarveṣāṃ kāraṇānāṃ sā kartṛbhūtā vyavasthitā // 400 [AbhT_8.400] bibhartyaṇḍānyanekāni śivena samadhiṣṭhitā / tadārūḍhaḥ śivaḥ kṛtyapañcakaṃ kurute prabhuḥ // 401 [AbhT_8.401] samanā karaṇaṃ tasya hetukarturmahośituḥ / anāśritaṃ tu vyāpāre nimittaṃ heturucyate // 402 [AbhT_8.402] tayādhitiṣṭhati vibhuḥ kāraṇānāṃ tu pañcakam / anāśrito@nāthamayamanantaṃ khavapuḥ sadā // 403 [AbhT_8.403] sa vyāpinaṃ prerayati svaśaktyā karaṇena tu / karmarūpā sthitā māyā yadadhaḥ śaktikuṇḍalī // 404 [AbhT_8.404] nādabindvādikaṃ kāryamityādijagadudbhavaḥ / yatsadāśivaparyantaṃ pārthivādyaṃ ca śāsane // 405 [AbhT_8.405] tatsarva prākṛtaṃ proktaṃ vināśotpattisaṃyutam / atha sakalabhuvanamānaṃ yanmahyaṃ nigaditaṃ nijairgurubhiḥ // 406 [AbhT_8.406] tadvakṣyate samāsādbuddhau yenāśu saṅkrāmet / aṇḍasyāntaranantaḥ kālaḥ kūṣmāṇḍahāṭakau brahmaharī // 407 [AbhT_8.407] rudrāḥ śataṃ savīraṃ bahirnivṛttistu sāṣṭaśatabhuvanā syāt / jalatejaḥsamīranabho@haṃkṛddhīmūlasaptake pratyekam // 408 [AbhT_8.408] aṣṭau ṣaṭpañcāśadbhuvanā tena pratiṣṭheti kalā kathitā / atra prāhuḥ śodhyānaṣṭau kecinnijāṣṭakādhipatīn // 409 [AbhT_8.409] anye tu samastānāṃ śodhyatvaṃ varṇayanti bhuvanānām / śrībhūtirājamiśrā guravaḥ prāhuḥ punarbahī rudraśatam // 410 [AbhT_8.410] aṣṭāvantaḥ sākaṃ śarveṇetīdṛśī nivṛttiriyaṃ syāt / rudrāḥ kālī vīro dharābdhilakṣmyaḥ sarasvatī guhyam // 411 [AbhT_8.411] ityaṣṭakaṃ jale@nau vahnyatiguhyadvayaṃ maruti vāyoḥ / svapuraṃ gayādi khe ca vyoma pavitrāṣṭakaṃ ca bhuvanayugam // 412 [AbhT_8.412] abhimāne@haṅkāracchagalādyaṣṭakamathāntarā nabho@haṃkṛt / tanmātrārkenduśratipurāṣṭakaṃ buddhikarmadevānām // 413 [AbhT_8.413] daśa tanmātrasamūhe bhuvanaṃ punarakṣavargavinipatite / manasaścetyabhimāne dvāviṃśatireva bhuvanānām // 414 [AbhT_8.414] dhiyi daivīnāmaṣṭau kruttejoyogasaṃjñakaṃ trayaṃ tadumā / tatpatiratha mūrtyaṣṭakasuśivadvādaśakavīrabhadrāḥ syuḥ // 415 [AbhT_8.415] tadatha mahādevāṣṭakamiti buddhau saptadaśa saṃkhyā / guṇatattve paṅktitrayamiti ṣaṭpañcāśataṃ purāṇi viduḥ // 416 [AbhT_8.416] yadyapi guṇasāmyātmani mūle krodheśvarāṣṭakaṃ tathāpi dhiyi / tacchodhitamiti gaṇanāṃ na punaḥ prāptaṃ pratiṣṭhāyām // 417 [AbhT_8.417] iti jalatattvānmūlaṃ tattvacaturviṃśatiḥ pratiṣṭhāyām / ambādituṣṭivargastārādyāḥ siddhayo@ṇimādigaṇaḥ // 418 [AbhT_8.418] guravo guruśiṣyā ṛṣivarga iḍādiśca vigrahāṣṭakayuk / gandhādivikārapuraṃ buddhiguṇāṣṭakamahaṃkriyā viṣayaguṇāḥ // 419 [AbhT_8.419] kāmādisaptaviṃśakamāgantu tathā gaṇeśavidyeśamayau / iti pāśeṣu puratrayamitthaṃ puruṣe@tra bhuvanaṣoḍaśakam // 420 [AbhT_8.420] niyatau śaṅkaradaśakaṃ kāle śivadaśakamiti puradvitayam / rāge suhṛṣṭabhuvanaṃ guruśiṣyapuraṃ ca vitkalāyugale // 421 [AbhT_8.421] bhuvanaṃ bhuvanaṃ niśi puṭapuratrayaṃ vākpuraṃ pramāṇapuram / iti saptaviṃśatipurā vidyā puruṣāditattvasaptakayuk // 422 [AbhT_8.422] vāmeśarūpasūkṣmaṃ śuddhaṃ vidyātha śaktitejasvimitiḥ / suviśuddhiśivau mokṣa dhuveṣisaṃbuddhasamayasauśivasaṃjñāḥ // 423 [AbhT_8.423] saptadaśapurā śāntā vidyeśasadāśivapuratritayayuktā / bindvardhendunirodhyaḥ parasauśivamindhikādipurasauṣumne // 424 [AbhT_8.424] paranādo brahmabilaṃ sūkṣmādiyutordhvakuṇḍalī śaktiḥ / vyāpivyomānantānāthānāśritapurāṇi pañca tataḥ // 425 [AbhT_8.425] ṣaṣṭhaṃ ca paramamanāśritamatha samanābhuvanaṣoḍaśī yadi vā / bindvāvaraṇaṃ parasauśivaṃ ca pañcendhikādibhuvanāni // 426 [AbhT_8.426] sauṣumnaṃ brahmabilaṃ kuṇḍalinī vyāpipañcakaṃ samanā / iti ṣoḍaśabhuvaneyaṃ tattvayugaṃ śāntyatītā syāt // 427 [AbhT_8.427] śrīmanmataṅgaśāstre ca kramo@yaṃ purapūgagaḥ / kālāgnirnarakāḥ khābdhiyutaṃ mukhyatayā śatam // 428 [AbhT_8.428] kūṣmāṇḍaḥ saptapātālī saptalokī maheśvaraḥ / ityaṇḍamadhyaṃ tadbāhye śataṃ rudrā iti sthitāḥ // 429 [AbhT_8.429] sthānānāṃ dviśatī bhūmiḥ saptapañcāśatā yutā / pañcāṣṭakasya madhyāddvātriṃśadbhūtacatuṣṭaye // 430 [AbhT_8.430] tanmātreṣu ca pañca syurviśvedevāstato@ṣṭakam / pañcamaṃ sendriye garve buddhau devāṣṭakaṃ guṇe // 431 [AbhT_8.431] yogāṣṭakaṃ krodhasaṃjñaṃ mūle kāle sanaiyate / patadrugādyāścāṅguṣṭhamātrādyā rāgatattvagāḥ // 432 [AbhT_8.432] dvādaśaikaśivādyāḥ syurvidyāyāṃ kalane daśa / vāmādyāstriśatī seyaṃ triparvaṇyabdhirasyayuk // 433 [AbhT_8.433] śaivāḥ kecidihānantāḥ śraikaṇṭhā iti saṃgrahaḥ / yatra yadā parabhogān bubhukṣate tatra yojanaṃ kāryam // 434 [AbhT_8.434] śodhanamatha taddhānau śeṣaṃ tvantargataṃ kāryam / ityāgamaṃ prathayituṃ darśitametadvikalpitaṃ tena // 435 [AbhT_8.435] anye@pi bahuvikalpāḥ svadhiyācāryaiḥ samabhyūhyāḥ / śrīpūrvaśāsane punaraṣṭādaśādhikaṃ śataṃ kathitam // 436 [AbhT_8.436] tadiha pradhānamadhikaṃ saṃkṣepeṇocyate śodhyam / kālāgniḥ kūṣmāṇḍo narakeśo hāṭako@tha bhūtalapaḥ // 437 [AbhT_8.437] brahmā munilokeśo rudrāḥ pañcāntarālasthāḥ / adhare@nantaḥ prācyāḥ kapālivahnyantanirṛtibalākhyāḥ // 438 [AbhT_8.438] laghunidhipatividyādhipaśambhūrdhvāntaṃ savīrabhadrapati / ekādaśabhirbāhye brahmāṇḍaṃ pañcabhistathāntarikaiḥ // 439 [AbhT_8.439] iti ṣoḍaśapurametannivṛttikalayeha kalanīyam / lakulīśabhārabhūtī diṇḍyāṣāḍhī ca puṣkaranimeṣau // 440 [AbhT_8.440] prabhāsasureśāviti salile pratyātmakaṃ saparivāre / bhairavakedāramahākālā madhyāmrajalpākhyāḥ // 441 [AbhT_8.441] śrīśailahariścandrāviti guhyāṣṭakamidaṃ mahasi / bhīmendrāṭṭahāsavimalakanakhalanākhalakurusthitigayākhyāḥ // 442 [AbhT_8.442] atiguhyāṣṭakametanmaruti ca satanmātrake ca sākṣe ca / sthāṇusuvarṇākhyau kila bhadro gokarṇako mahālayakaḥ // 443 [AbhT_8.443] avimuktarudrakoṭī vastrāpada ityadaḥ pavitraṃ khe / sthūlasthūleśaśaṅkuśrutikālañjarāśca maṇḍalabhṛt // 444 [AbhT_8.444] mākoṭāṇḍadvitayacchagalāṇḍā aṣṭakaṃ hyahaṅkāre / anye@haṅkārāntastanmātrāṇīndriyāṇi cāpyāhuḥ // 445 [AbhT_8.445] dhiyi yonyaṣṭakamuktaṃ prakṛtau yogāṣṭakaṃ kilākṛtaprabhṛti / iti saptāṣṭakabhuvanā pratiṣṭhitiḥ salilato hi mūlāntā // 446 [AbhT_8.446] nari vāmo bhīmograu bhaveśavīrāḥ pracaṇḍagaurīśau / ajasānantaikaśivau vidyāyāṃ krodhacaṇḍayugmaṃ syāt // 447 [AbhT_8.447] saṃvarto jyotiratho kalāniyatyāṃ ca sūrapañcāntau / vīraśikhīśaśrīkaṇṭhasaṃjñametattrayaṃ ca kāle syāt // 448 [AbhT_8.448] samahātejā vāmo bhavodbhavaścaikapiṅgaleśānau / bhuvaneśapuraḥsarakāvaṅguṣṭha ime niśi sthitā hyaṣṭau // 449 [AbhT_8.449] aṣṭāviṃśatibhuvanā vidyā puruṣānniśāntamiyam / hālāhalarudrakrudambikāghorikāḥ savāmāḥ syuḥ // 450 [AbhT_8.450] vidyāyāṃ vidyeśāstvaṣṭāvīśe sadāśive pañca / vāmā jyeṣṭhā raudrī śaktiḥ sakalā ca śontayam // 451 [AbhT_8.451] aṣṭādaśa bhuvanā syāt śāntyatītā tvabhuvanaiva / iti deśādhvavibhāgaḥ kathitaḥ śrīśambhunā samādiṣṭaḥ // 452 [AbhT_8.452]