Translation: paryantapancasika

śrī gaṇapataye namaḥ | ādyantāntargatānantaśaktiviśrāntinirbharām | anuccāryām ahaṃ vācam adhīye hṛdayaṃ vibhoḥ sa eva bhairavo devas sarve devāś ca yanmayāḥ | saivāsau bhairavī sattāsattāpi ca yanmayī tad eva bhairavaṃ jñānam ajñānam api yanmayam | sa hi bhairavasiddhāntaḥ pūrvapakṣo 'pi yanmayaḥ aikadhyam adhvanāṃ ṣa.ṅnāṃ yatra sā bhairavī sthitiḥ | paryante sarvatantrāṇām avācyā paramā gatiḥ sā cidānandamātrātmamagnecchājñānasatkriyā | hṛdayaṃ devadevasya bhairavasyāvibhāgabhūḥ citsvābhāvyād asau devaḥ svātmanā vimṛṣan prabhuḥ | anāśritādibhūmyantā bhūmikāḥ pratipadyate tatra vācakavācyātmaspandayor ekaśaḥ prabhoḥ | sthūlasūkṣmaparābhāsakramayoḥ ṣaḍvidhādhvatā

kramo yo deśakālātmā bhedaprāṇas sa saṃvidām | vicchedād eṣa vijñātur vicitrābhāsatākṛtaḥ ubhayo tatra vai rītiḥ śuddhāśuddhātmabhedataḥ | śuddhir bahiṣkṛtārthānāṃ svāhantāyāṃ nimajjanam aśuddhir api magnānāṃ naivaṃ hṛdayaviśramaḥ | atrāntare 'py anantās syuḥ sthitayas tāratamyataḥ ucitocitameyānāṃ pramātṝṇāṃ prakāśane | sādhāraṇānyathābhāvau bhidyete mātṛmeyayoḥ avikalpasphuṭābhāsā sā sṛṣṭiḥ śāmbhavī matā | abhedenātmanirmāṇe svātmaiva karaṇīkṛtaḥ kriyājñānātmacicchaktir bhedāsūtraṇakāraṇāt | kalāvidyāpadaṃ prāpya bhedodbhede punar bhavet pramāṇabuddhiprakarā yatkriyāyā vikalpanāḥ | saiva vicchinnavicchinnakriyā jñānodyamā yadā

karmabuddhyakṣatāṃ prāptā tadāsau paśur ucyate | itīcchayā sa bhagavān bhairavaḥ parimīyate mitavṛttis satī sā ca śaktis tam anuvartate | tasya vidyeśasādākhyaśivatās saṃkucatsthiteḥ | dehaprāṇabuddhiśūnyapramātṛtvam upāgaman tasyāsādhāraṇī sṛṣṭis tattannānāvikalpanā | śaivasargotthasaṃskārasaṃskṛtasya tadāśrayā pramātaivāyam etāvatprakāro 'vagrahotsave | avyagro vartate svātmany avikalpe cidātmake vatsa paśya tvam evaitat advayatvena saṃvidaḥ | viditaṃ tanmayaṃ viśvam anyat tuccham asad yataḥ kim upāyam idaṃ tattvaṃ yato 'nyan naiva sambhavi | ananyopāyam etat tadātmopāyaṃ pracakṣate saṃhṛtya sarvataś cintām [aha]m ity anuśīlayan | avikalpāṃ svasaṃvittiṃ pratyakṣāṃ pratipadyate

anantaitāvadākārasvīkāre 'py ekalakṣaṇām | tāṃ svasaṃvidam āviśya vikalpān na vikalpayet khecaryādicatussrotovāhapūrṇamahāhradām | vyomeśvarīm ātmacitiṃ vigāhya broḍayej jaḍam sargasthāpanasaṃhāranigrahānugrahakramāt | pañcakṛtyāni kurvāṇaḥ śivo 'ham iti viśvaset kṣepajñānaprasaṃkhyā[naga]tinādakrameṇa vā | guruvaktreṇa tāny ātmany ākalayya kṛtī bhavet vikalpayitvā viśvātmā bhairavo 'haṃ mamaiva tāḥ | viśvabhaṅgyo yathā vahner jvālābhaṅgyaḥ prabhā raveḥ eko 'haṃ mātṛvijñānamānameyaprakāravān | śuddhabodhādirūpeṇa khecaryādicaturdaśaḥ medāmedaprakāreṇa bandhamokṣau vibhāvayan | bhairavo 'smīti visrambhāt svācchandyaṃ paramaṃ vrajet

antaḥkārabahiṣkārāv akālakramam ātmanaḥ | aparādhīnam ādhatse yat tvaṃ prābhavanirbharaḥ anuttaravisargātmaviśramodayayāmalam | saṃghaṭṭaś śivaśaktyos tadantare cānyaśaktayaḥ ānandeccheśanonmeṣā ūnatā ceśanecchayoḥ | asphuṭasphuṭabhedena vedyollāsas tayor vidaḥ ānandānuttarābhyāṃ ca sandhībhāvo 'tha vedanā | vedyānāṃ prāṇabhūteti pūrṇaṃ tad bhairavaṃ vapuḥ vedyollāso 'yam icchāyām īśane caikataḥ sthitaḥ | sthūlatvena pṛthivyādibhūtapañcakatām iyāt sūkṣmatvena ca gandhādipañcatanmātratāṃ tataḥ | karaṇatvena saṃsparśād indriyāṇāṃ dvipañcatām vedyatāyāḥ chādanena vettṛtodbhāsanakrame | mano 'haṃbuddhitāṃ eṣām avibhāge pradhānatām | puruṣatvaṃ ca saṃkocavikāsau yadapekṣayā

abhūvann iṣyasaṃyogād dvirūpād ubhayātmanaḥ | icchāsvarūpād unmeṣād anyathānuttarāyutāt catasraś śaktyo 'ntaḥsthāḥ puṃso 'syāntaś ca dhārikāḥ | cidvyomno jaḍabhūmeś ca māyāmayyas triśaṅkuvat icchāśaktes trirūpāyās tisro 'nyāś śaktyo 'bhavan | visargo 'yam athātyarthaṃ sphuṭo 'bhūt sṛjyavistarāt etat sṛṣṭvātmaśaktīnām itaretaramiśrāt | bhavet kṣobhāntaraṃ nāsmād visargād bāhyato bhavet iyatsarvaṃ sad icchādidvārānuttarabhairave | viśramya viśramya muhus tata eva visṛjyate antarnilīnānantārthasvātmāmarśaś citiḥ parā | ekavāravahād yeyaṃ mantrī vāk śuddhakartṛtā trivahaṃ tripathaṃ tristhaṃ kālaṃ sā karṣati svataḥ | bahis tataś cātmanīti śrīparā kālakarṣiṇī

bheditāntaḥkṛtākha.ṅdabhāvāvekṣā parāparā | kartṛtā saiva paśyantī tasyaiveśadaśāśrayā || 43 madhyamā sakramā sthūlā antaḥkaraṇavartinī | vikalpanābhinnavācyā prāṇavṛttivibheditā svavāsanātādavasthyād daśayoḥ pūrvayor api | māyāmātur mitatvaṃ syāt paśyantyāś ca kramo hy aṇuḥ tayor āviśya daśayoḥ kramāc chāntavikalpayoḥ | dhanyas svasaṃvidvistāraṃ sāścaryam anupaśyati sā sthānakaraṇāghātapuṃvyāpārātmikā satī | vaikharī vṛttayo yasyāstā imāḥ śrutigocarāḥ ābhiḥ parasparaṃ jñānasaṃkrāntyātmā sa laukikaḥ | vyavahāro 'tha śāstrīyo nānāsaṃkocasaṃkaṭaḥ iti vāgvyāptividvāṃsam etadvargādhidevatāḥ | māheśvarīmukhā devyo jāgare 'pi na bhuñjate upāyenāgrahaḥ kārya upeyā bhairavīsthitiḥ | yāsau svasaṃvit tām eva sarvopāyāṃ samāviśet

ādyantāntargatānantavācyavācakanirbharam | rahasyaṃ mantramudrāṇāṃ prapadye 'nuttaraṃ mahaḥ śambhor abhinnahṛdayā jayanti guravaḥ purā | nirvyutthānasamādhānaprāptaparyantasaṃpadaḥ