### Provenance: Mukhabodha M00048 · CC BY-NC 4.0
### Source file: parAprAvezikA-M00048-IAST.txt
### Vendored: site/data/sanskrit/parapravesika.txt (research/education use; respect licence)
####################################################
MUKTABODHA INDOLOGICAL RESEARCH INSTITUTE
Use of this material (e-texts) is covered by Creative Commons license BY-NC 4.0
Catalog number: M00048
Uniform title: parāprāveśikā
Author : kṣemarāja
Description:
E-text transcribed from Volume 15 of the Kashmir Series of Texts and Studies .
Notes:
E-text transcribed by the staff of Muktabodha under the supervision of Mark S.G. Dyczkowski. Revision 0: 11/28/2005
Publisher : Research Department Jammu and Kashmir State
Publication year : 1918
Publication city : Bombay
Publication country : India
####################################################
oṃ namaḥ śivāya nikhilatattvātmane
atha
parāprāveśikā
śrīmanmahāmāheśvarācāryavaryakṣemarājaviracitā |
viśvātmikāṃ taduttirṇāṃ hṛdayaṃ parameśituḥ |
parādiśaktirūpeṇa sphurantīṃ saṃvidaṃ numaḥ ||
iha khalu parameśvaraḥ prakāśātmā, prakāśaśca [nanu
parameśvaraḥ prakāśasvabhāvatve'pi kiṃ
śāntabrahmavādināmiva kevalabodhasvabhāvaḥ
syādityāśaṅkyāha prakāśaśceti |] vimarśasvabhāvaḥ, vimarśo
[vimarśo hi parimitāparimitatvābhyāṃ dvidhā, tatra parimitatve
śūnyādipramātrucitena tena saṃvitprakāśasya paricchinnatvaṃ mā
bhūdityāśayenāha vimarśo nāmeti, sa ca vimarśo viśvākāreṇa
sṛṣṭau, tatprakāśena sthitau, svātmasātkārātmanā saṃharaṇena
saṃhāre ca pūrṇāhantācamatkārātmaka iti yāvat |] nāma
viśvākāreṇa viśvaprakāśena viśvasaṃharaṇena ca (p. 2)
akṛtrimāham iti visphuraṇam | yadi [yaditi | vimarśavikalaḥ
sūryādiprakāśo yathā parāpekṣatvāt jaḍapakṣapātī
asvātantryamāśritavān tathaiva nirvimarśatayā saṃvitprakāśe'pi
prasaktirāpatediti bhāvaḥ |] nirvimarśaḥ syāt anīśvaro jaḍaśca
prasajyeta | eṣa eva ca vimarśaḥ - cit, caitanyaṃ, svarasoditāparāvāk,
svātantryaṃ, paramātmano mukhyamaiśvaryaṃ, kartṛtvaṃ, sphurattā,
sāro, hṛdayaṃ, spandaḥ ityādiśabdairāgameṣūddhoṣyate [iha
śaivaśāsananaye saṃvitprakāśasya vimarśaprādhānyameva
tattadāgameṣu samuddhuṣṭaṃ, sa eva
bhinnabhinnābhirāgamabhāṣābhirāmnāyate, yathā - caitanyamiti
vimarśa eva mukhyamātmano rūpamityabhipretya dharmavācinā
śabdena nirdeśaḥ kṛtaḥ | tathā svarasoditāparāvāk iti - vakti
viśvamabhilapati pratyavamarśeneti vāk, saiva
parāmarśāntarāṇāmādhārabhūtatvāt pūrṇatvācca parā, ata eva
aniruddhaprasaratvāt ahamiti paripūrṇacidvapuṣā sadoditatvāt
svarasoditeti | tathā svātantryamiti, svātantryaṃ ca
saṃyojanaviyojanādirūpaṃ svasmāt bahiṣkṛtamidantāpadaṃ
svātmani saṃyojayati, saṃyojyāpi viyojayati,
śūnyādibhūmikāyāṃ ca nyagbhāvayati, - ityādilakṣaṇatvena
jaḍādvailakṣaṇyādhāyīti | tathā aiśvaryamiti
viśvasargādāvananyāpekṣitvaṃ na tu asya māyāgarbhādhikāriṇo
brahmāderiva parecchāvaśavartitvena niyatiniyantraṇāvattvam iti |
tathā kartṛtvamiti, etadeva kartṛtvaṃ yat alaukikena
kāryakāraṇabhāvena svāntaḥprakāśaikyena sthitasya śivādeḥ
pṛthivyantasya viśvasya idantayā samunmīlanaṃ yoginirmāṇavat iti |
tathā sphuratteti sphuraṇasaṃbandhaḥ, taddhaṭādernāsti, tathātve hi
sarveṣāṃ sadaiva ghaṭādikaṃ prasphuret na kasyacidveti
sarvasarvajñatā tadviparyayo vā prasajyeta, ato mama sphuratīti
madīyaṃ sphuraṇamāviṣṭa ityarthaḥ | sāramiti atucchaṃ rūpaṃ, sā
parameśvarasya vimarśaśaktireveti | hṛdayamiti
viśvapratiṣṭhāsthānatvāt | spanda iti acalasya citprakāśasya
calattābhāsanaṃ, yat tatra anatiriktatvepi atiriktatayeva
viśvāvabhāsanamityarthaḥ |] (p. 3) ata eva
[vimarśaśaktimāhātmyādeva parameśvaro
viśvavaicitryaprathātmanā svātmanaiva samullasatīti pratipādayan
vimarśaśaktilakṣaṇamupasaṃharati ata eveti |
māyāprakṛtyāderjagatsṛṣṭau kāraṇāntarasya
bhedābhedavikalpairupahatatvāt na tatkartṛtvamupapadyate iti bhāvaḥ |]
akṛtrimāhamiti - satattvaḥ svayaṃprakāśarūpaḥ parameśvaraḥ
pārameśvaryā śaktyā śivādi - dharaṇyantajagadātmanā sphurati
prakāśate ca | etadeva [yadviśvātmanā parameśvarasya prasphuraṇam
idameva pāramārthikaṃ kartṛtvaṃ, tatsphuraṇātmanaiva
prakāśyamānasya viśvasyājaḍabhāvo'pi syādityāha etadeveti |]
asya jagataḥ kartṛtvamajaḍatvaṃ ca, jagataḥ [nanu jagadviṣayaṃ kīdṛk
kāryatvaṃ bhedenābhedena vā, bhinnatve tatkartuḥ parameśvarasya
svātantryaṃ nāma vighaṭeta, abhinnatve kathaṃ tat ityāśaṅkyāha
jagata iti | asya jagataḥ paraprakāśaṃ vinā acetyamānatvāt
svātmalābho durghaṭaḥ, tadāśrayatvāvalambanāt tat
prakāśaśarīratāmetītyetadeva kāryatvaṃ, kevalaṃ
māyāsvātantryeṇa bhedodbhāsanādabhinnatve'pi bhinnavyavahāra
iti bhāvaḥ |] kāryatvamapi etadadhīnaprakāśatvameva, evaṃbhūtaṃ
jagat (p. 4) prakāśarūpāt karturmaheśvarādabhinnameva,
bhinnavedyatve'prakāśamānatvena [abhedatve viśvaṃ bhātuṃ
pragalbheta, anyathā svarūpaśūnyatvāt viśvavyavahāro
hānādānādirūpo vinaśyedityāśayenāha bhinnavedyatve iti |]
prakāśanāyogāt na kiṃcitsyāt, anena [nanu yadi jagat
parameśvarādabhinnaṃ tat prakāśaikarūpasya jagato
bhāsamānatvāt parameśvare sārūpyabhedo durvāraḥ, tenāpi tasya
tirodhīyamānatvaṃ bhavediti śaṅkāṃ nivārayannāha aneneti |
pratyuta svātmani labdhe'pi prakāśāvaraṇāt svayameva naṣṭaṃ
bhavedityarthaḥ |] ca jagatā asya bhagavataḥ prakāśātmakaṃ rūpaṃ
na kadācit tirodhīyate, etatprakāśanena pratiṣṭhāṃ labdhvā
prakāśamānamidaṃ jagat ātmanaḥ prāṇabhūtaṃ kathaṃ
niroddhuṃ śaknuyāt, kathaṃ ca tannirudhya svayamavatiṣṭheta,
ataścāsya [jñāpakādikārakāṇi pūrvasiddhe īśvare vyāparītuṃ
na śaknuvantītyāśayaṃ gṛhītvā tadvidhyādikartuḥ pramāturapi
tādrūpyeṇa sattvāt na tatsiddhiḥ pramāṇādhīnā, ityataḥ
svaprakāśatvaṃ tasyānubhavasiddhamityāha ataścāsyeti |] vastunaḥ
sādhakamidaṃ bādhakamidaṃ
pramāṇamityanusaṃdhānātmakasādhakabādhakapramātṛrūpatayā
cāsya sadbhāvaḥ, tatsadbhāve kiṃ pramāṇam ? - iti
vastusadbhāvamanumanyatāṃ, tādṛksvabhāve kiṃ pramāṇam ? - iti
praṣṭṛrūpatayā ca pūrvasiddhasya (p. 5) maheśvarasya
svayaṃprakāśatvaṃ sarvasya svasaṃvedanasiddham | kiṃ ca
[saṃvitprakāśa eva sarvajīvitabhūto māyīyavyavahāre pramāṇaṃ
kalpayati ityataḥ pūrvasiddhatvāt tatra pramāṇaṃ kimapi nopayujyate
ityāha kiṃ ceti | paraprakāśāpekṣayānyatsarvaṃ jaḍatayā
svātmānamapi bhāsayitumaśaktaṃ kathaṃ paraṃ
vyavasthāpayitumudyacchediti yāvat |] pramāṇamapi yamāśritya
pramāṇaṃ bhavati tasya pramāṇasya
tadadhīnaśarīraprāṇanīlasukhādivedyaṃ cātiśayya sadā
bhāsamānasya vedakaikarūpasya sarvapramitibhājaḥ siddhau
abhinavārthaprakāśasya pramāṇavarākasya kaścopayogaḥ [kaśca
upayoga iti, pramāṇaṃ nāma abhinavābhāsarūpaṃ pramātari
pramitilakṣaṇāṃ viśrāntiṃ vidadhat pramāṇaṃ bhavati, pramātā
ca nityāvabhāsitatvādavicchinnābhāsaḥ sarvāḥ pramitīḥ svātmani
antarmukharūpe bhajate, tat tasmin kathamabhinava ābhāsa
upayujyatām tatpramitiśca kutrānyatra viśrāmyatu, tasmāt
dehaprāṇanīlasukhādivedya eva pramāṇopayogaḥ na tu
pramāṇajīvitabhūte parameśvare | taduktam
pramāṇānyapi vastūnāṃ jīvitaṃ yāni tanvate |
teṣāmapi paro jīvaḥ sa eva parameśvaraḥ ||
iti |] | evaṃ ca śabdarāśimayapūrṇāhantāparāmarśasāratvāt
[śabdarāśimayeti, śabdarāśiḥ - akārādi - hakārānto
varṇasamūho garbhīkṛtasamastaviśvastanmayo
yo'nanyamukhaprekṣitvasvātantryaviśrāntirūpaḥ ahameva
prakāśātmā prakāśe ityevaṃ - rūpaḥ
pūrṇāhantāparāmarśaḥ sa eva sāram atucchaṃ rūpaṃ yasya tasya
bhāvastasmāddhetorityarthaḥ |] (p. 6) paramaśiva eva
ṣaṭtriṃśattattvātmakaḥ prapañcaḥ | ṣaṭtriṃśattattvāni
[ṣaṭtriṃśattattvāni, tasya bhāvastattvam iti bhinnānāṃ vargāṇāṃ
vargīkaraṇanimittaṃ yadekamavibhaktaṃ bhāti tattattvam, yathā
girivṛkṣapuraprabhṛtīnāṃ nadīsaraḥsāgarādīnāṃ ca
pṛthivīrūpatvamabrūpatvaṃ ceti |] ca, - 1 śiva 2 śakti 3 sadāśiva 4
īśvara 5 śuddhavidyā 6 māyā 7 kalā 8 vidyā 9 rāga 10 kāla 11
niyati 12 puruṣa 13 prakṛti 14 buddhi 15 ahaṃkāra 16 manaḥ 17 śrotra
18 tvak 19 cakṣuḥ 20 jihvā 21 ghrāṇa 22 vāk 23 pāṇi 24 pāda 25
pāyu 26 upastha 27 śabda 28 sparśa 29 rūpa 30 rasa 31 gandha 32
ākāśa 33 vāyu 34 vahni 35 salila 36 bhūmayaḥ, ityetāni |
athaiṣāṃ lakṣaṇāni | tatra śivatattvaṃ nāma icchā - jñāna -
kriyātmakakevalapūrṇānandasvabhāvarūpaḥ paramaśiva
[sarvapramātṛṇāmantaḥ parisphuratpūrṇāhantācamatkāramayaṃ
sarvatattvottirṇaṃ
sakalatattvarāśigatasṛṣṭisaṃhāraśatasahasrapratibimbanasahiṣṇu
mahāprakāśavapuḥ śivatattvam |] eva | asya jagat sraṣṭumicchāṃ
parigṛhītavataḥ parameśvarasya prathamaspanda evecchāśaktitattvam
[tasyaiva svasvātantryamāhātmyāt bahirullilasiṣayā
parānandacamatkārodrekāt ahamiti parāmarśaḥ śaktitattvam |] (p. 7)
apratihatecchatvāt, sadevāṅkurāyamāṇamidaṃ jagat
svātmanāhantayācchādya sthitaṃ rūpaṃ sadāśivatattvam, [yadā
parameśvaraḥ śuddhacinmātrādhikaraṇa evāhamityaṃśe
idamaṃśamullāsayati tadā tasya
pronmīlitamānacitrakalpabhāvarāśiviṣayatvena asphuṭatvāt
icchāpradhānaṃ sadāśivatattvam |] aṅkuritaṃ jagadahantayāvṛtya
sthitamīśvaratattvam [sphuṭībhūte ca idamaṃśe yadāhamaṃśaṃ
niṣiñcati tadā jñānaśaktipradhānamīśvaratattvam | anayoḥ
proktayostattvayorahaṃvimarśasyāviśeṣe'pi idamaṃśasya
dhyāmalatvādhyāmalatvābhyāṃ viśeṣaḥ |],
ahantedantayoraikyapratipattiḥ śuddhavidyā [yadā punaḥ
prarūḍhabhedabhāvarāśigatedamaṃśasphuraṇe
cinmātragatatvenāhamaṃśaḥ samullasati bhedādvaitavādināmiva
īśvarasya yaḥ samadhṛtatulāpuṭanyāyenāhamidamiti parāmarśaḥ
tat kriyāśaktipradhānaṃ vidyātattvam |], svasvarūpeṣu bhāveṣu
bhedaprathā māyā [māyeti,
duṣkaratamavastusaṃpādanāpratīghātarūpā acidrūpe śūnyādau
ca pramātṛtābhimānaṃ prarūḍhaṃ kurvatī cidekamayānapi
bhāvān bhedena ābhāsayantī svarūpaṃ tirodadhatī
kalādikṣityantānāṃ bhāvānāmupādānakāraṇaṃ ca māyā |],
yadā tu parameśvaraḥ pārameśvaryā māyāśaktyā
[māyāśaktyeti, svātantryāparaparyāyayā |] svarūpaṃ (p. 8)
gṛhayitvā saṃkucitagrāhakatāmaśnute tadā puruṣasaṃjñaḥ,
ayameva māyāmohitaḥ karmabandhanaḥ [karmabandhana iti, karmāṇi
svātmano bandhakāni abhimanyamānaḥ |] saṃsārī [saṃsārīti,
saṃsarati ityataḥ saṃsārī, deho'pi svarūpasādṛśyaṃ
bālyayauvanādiṣu anuvartayan saṃsaratīva, buddhyādestu
janmāntare'pi saṃsaraṇam |], parameśvarādabhinno'pi asya mohaḥ
parameśvarasya na bhavet - indrajālamiva aindrajālikasya svecchayā
saṃpāditabhrānteḥ, vidyābhijñāpitaiśvaryastu
[vidyābhijñāpitaiśvaryastu iti, vidyayā svarūpaprakāśanaśaktyā
abhijñāpadaṃ prāpitamaiśvaryaṃ yasya, ata eva ciddhanaḥ
śarīrādyapi viśvamacidrūpavyāmiśraṇaśūnyaṃ saṃvedanameva
abhimanyamāna ityarthaḥ |] ciddhano muktaḥ [mukta iti,
punarjanmabandhavirahāt dehe sthite'pi mukta iti vyapadeśayogya iti
bhāvaḥ | patite tu paramaśivasvarūpa eveti |] paramaśiva eva | asya
sarvakartṛtvaṃ sarvajñatvaṃ pūrṇatvaṃ nityatvaṃ vyāpakatvaṃ ca,
śaktayo'saṃkucitā api saṃkocagrahaṇena kalā - vidyā - rāga - kāla
- niyatirūpatayā [niyatirūpatayā bhavantīti, yathā
rājñāpahṛtasarvasvasya anukampayā jīvanārthaṃ kiṃcit stokaṃ
dhanaṃ dīyate tathaiva aṇutvamāpannasya bodhasya
apahṛtasarvajñatvādestatsthāne kiṃcitkartṛtādiparamārthaṃ
kalādikaṃ vitīryate iti bhāvaḥ |] bhavanti | atra kalānāma [kaleti,
yayā sarvaṃ kartuṃmasamarthaḥ kiṃcideva ghaṭādikaṃ karotīti |] (p.
9) asya puruṣasya kiṃcitkartṛtāhetuḥ, vidyā [vidyeti, yayā kiṃcideva
purovarti ghaṭādikaṃ jānāti na punardūravyavahitaṃ vastu iti |]
kiṃcijjñatvakāraṇam, rāgo [rāga iti, apūrṇamanyatayā idaṃ mama
upayujyate, bhūyāsaṃ, mā kadācit na bhūvam ityevaṃrūpaḥ |]
viṣayeṣvabhiṣvaṅgaḥ, kālo hi bhāvānāṃ
bhāsanābhāsanātmakānāṃ kramo'vacchedako [kramo'vacchedaka
iti, ājñāsiṣaṃ jānāmi jñāsyāmi iti, akārṣaṃ karomi kariṣyāmi
iti jñānakriyāsvarūpeṇa bhāvānapi tathā kalayan avacchinatti iti |]
bhūtādiḥ, niyatiḥ [niyatiriti, mamedaṃ kartavyamiti, idaṃ
svargādiphalakamaśvamedhādikameva mayā kartavyaṃ na
nirayādiphalakaṃ brahmahananādi iti | atha ca niyatādeva
kāraṇānniyatameva kāryamityādi bahuvidhaṃ niyatirūpam |]
mamedaṃ kartavyaṃ nedaṃ kartavyam iti niyamanahetuḥ, etat
pañcakam asya svarūpāvarakatvāt kañcukamiti [kañcukamiti,
svarūpādvyatiriktamapi avyatiriktatayā
pūrṇasaṃvitsvarūpamācchādya sthitamityarthaḥ |] ucyate, mahadādi
- pṛthivyantānāṃ tattvānāṃ mūlakāraṇaṃ prakṛtiḥ, eṣā ca
sattvarajastamasāṃ [sattvarajastamasāṃ
sukhaduḥkhamohātmakānāṃ
prakāśakriyāniyamanasvabhāvānāṃ sāmyāvasthā sāmānyaṃ
rūpaṃ, yatraiṣāmaṅgāṅgibhāvo nopalabhyata ityarthaḥ |]
sāmyāvasthā (p. 10) avibhaktarūpā, niścayakāriṇī
[niścayakāriṇīti, idametādṛk ityevaṃrūpo niścayaḥ |]
vikalpapratibimbadhāriṇī [sattvapradhānatvena svacchatayā
pratibimbagrahayogyatvāt vikalpapratibimbadhāriṇīti bhāvaḥ |]
buddhiḥ, ahaṃkāro nāma - mamedaṃ na
mamedamityabhimānasādhanam, manaḥ saṃkalpasādhanam,
etattrayamantaḥkaraṇam [antarvedyasya sukhādergrahaṇasādhanatvāt
antaḥkaraṇam | aṅgāṅgibhāvena guṇānāṃ kāryaṃ,
vakṣyamāṇasya bhūtendriyādeḥ kāryavargasya ca kāraṇam |] |
śabdasparśa - rūpa - rasa - gandhātmakānāṃ viṣayāṇāṃ krameṇa
grahaṇasādhanāni śrotra - tvak - cakṣurjihvā - ghrāṇāni pañca
jñānendriyāṇi | vacanādāna - viharaṇa -
visargānandātmakriyāsādhanāni paripāṭhyā vākpāṇi - pāda -
pāyūpasthāni pañca karmendriyāṇi | śabda - sparśa - rūpa rasa -
gandhāḥ sāmānyākārāḥ pañca tanmātrāṇi [tanmātrāṇīti,
tadeva nādhikaṃ tatra anyadastīti
tanmātraśabdenāvāntaraviśeṣarahitā śabdādyā ucyante |] |
ākāśamavakāśapradam, vāyuḥ saṃjīvanam, agnirdāhakaḥ
pācakaśca, salilamāpyāyakaṃ dravarūpaṃ ca, bhūmirdhārikā, (p.
11)
yathā [yatheti, yathā vaṭabīje tatsamucitenaiva vapuṣā
aṅkurapatraphalāni tiṣṭhanti evaṃ
nānāvidhatanukaraṇādivaicitryaśāli viśvamidaṃ
hṛdayabījāntaḥsthitaṃ | mayūrāṇḍarase
sarvaśikhyavayavānupraviṣṭavarhopavarhādipūrṇarekhādivaicitrya-
śilpakalpanākauśalavat avadhānadhanaiḥ
sūkṣmekṣikayāvadhāryam |] nyagrodhabījasthaḥ śaktirūpo
mahādrumaḥ |
tathā hṛdayabījasthaṃ viśvametaccarācaram ||
ityāmnāyanītyā parābhaṭṭārikārūpe
hṛdayabīje'ntarbhūtametajjagat | kathaṃ ? - yathā
ghaṭaśarāvādīnāṃ mṛdvikārāṇāṃ pāramārthikaṃ rūpaṃ
mṛdeva, yathā vā jalādidravajātīnāṃ vicāryamāṇaṃ
vyavasthitaṃ rūpaṃ jalādisāmānyameva bhavati, tathā
pṛthivyādimāyāntānāṃ tattvānāṃ satattvaṃ mīmāṃsyamānaṃ
sadityeva bhavet, asyāpi padasya nirūpyamāṇaṃ
dhātvarthavyañjakaṃ pratyayāṃśaṃ visṛjya prakṛtimātrarūpaḥ
sakāra evāvaśiṣyate, tadantargatamekatriṃśattatvam, tataḥ paraṃ
śuddhavidyeśvara - sadāśivatattvāni jñāna - kriyāsārāṇi
śaktiviśeṣatvāt
aukāre'bhyupagamarūpe'nuttaraśaktimaye'ntarbhūtāni | ataḥ
paramūrdhvādhaḥ sṛṣṭirūpo visarjanīyaḥ, evaṃ - bhūtasya
hṛdayabījasya mahāmantrātmako viśvamayo [viśvamayo viśvottīrṇa
iti, sarvākāratvaṃ nirākāratvaṃ cātra krameṇa hetuḥ |]
viśvottīrṇaḥ paramaśiva evodayaviśrāntisthānatvānnijasvabhāvaḥ
| īdṛśaṃ hṛdayabījaṃ tattvato yo veda samāviśati ca sa paramārthato
dīkṣitaḥ [dīkṣita iti, tilājyāhutivarjitametatparijñānameva tattvato
dīkṣā iti bhāvaḥ |] prāṇān dhārayan laukikavadvartamāno
jīvanmukta eva bhavati, dehapāte paramaśivabhaṭṭāraka eva bhavati ||
iti śrīmanmahāmāheśvarācāryavaryakṣemarājaviracitā
parāprāveśikā samāptā ||
sadvidyānāṃ saṃśraye granthavidvad-
vyūhe hrāsaṃ kālavṛttyopayāte |
tattatsaddharmoddidhīrṣaikatāna-
satprakṣaujaḥśālinā karmavṛttyai || 1 ||
śrīmatkaśmīrādhirājena mukhyai-
rdharmodyuktairmantribhiḥ svairvivecya |
pratyaṣṭhāpi jñānavijñānagarbha-
granthoddhṛtyai mukhyakāryālayo yaḥ || 2 ||
tatrājīvaṃ nirviśadbhirmukunda-
rāmādhyakṣatvāśritaiḥ sadbhireṣaḥ |
pūrtyā śuddhyā vyākhyayā saṃskṛtaḥ stāt
pūrṇo granthaḥ śreyase sajjanānām || 3 ||
(tilakam)
śrīsvātmaśivārpaṇaṃ śivadaṃ ca bobhavītu
adhyetṛśrotṛvimraṣṭṛṇām ||
########### END OF FILE #######