Section 24

:C24 atha śrītantrāloke caturviṃśatitamamāhnikam atha śāmbhavaśāsanoditāṃ sarahasyāṃ śṛṇutāntyasaṃskriyām // 1b [AbhT_24.1] sarveṣāmadharasthānāṃ gurvantānāmapi sphuṭam / śaktipātātpurāproktātkuryādantyeṣṭidīkṣaṇam // 2 [AbhT_24.2] ūrdhvaśāsanagānāṃ ca samayopahatātmanām / antyeṣṭidīkṣā kartavyā guruṇā tattvavedinā // 3 [AbhT_24.3] samayācāradoṣeṣu pramādātskhalitasya hi / antyeṣṭidīkṣā kāryeti śrīdīkṣottaraśāsane // 4 [AbhT_24.4] yatkiṃcitkathitaṃ pūrvaṃ mṛtoddhārābhidhe vidhau / pratimāyāṃ tadevātra sarvaṃ śavatanau caret // 5 [AbhT_24.5] śrīsiddhātantrakathito vidhireṣa nirūpyate / antimaṃ yadbhavetpūrvaṃ tatkṛtvāntimamādimam // 6 [AbhT_24.6] saṃhṛtyaikaikamiṣṭiryā sāntyeṣṭirdvitayī matā / pūjādhyānajapāpluṣṭasamaye natu sādhake // 7 [AbhT_24.7] piṇḍapātādayaṃ muktaḥ khecaro vā bhavetpriye / ācārye tattvasaṃpanne yatra tatra mṛte sati // 8 [AbhT_24.8] antyeṣṭirnaiva vidyeta śuddhacetasyamūrdhani / mantrayogādibhirye ca māritā narake tu te // 9 [AbhT_24.9] kāryā teṣāmihāntyeṣṭirguruṇātikṛpālunā / na maṇḍalādikaṃ tvatra bhavecchamāśānike vidhau // 10 [AbhT_24.10] kecittadapi kartavyamūcire pretasadmani / pūjayitvā vibhuṃ sarvaṃ nyāsaṃ pūrvavadācaret // 11 [AbhT_24.11] saṃhārakramayogena caraṇānmūrdhapaścimam / tathaiva bodhayedenaṃ kriyājñānasamādhibhiḥ // 12 [AbhT_24.12] bindunā rodhayettattvaṃ śaktibījena vedhayet / ghaṭṭayennādadeśe tu triśūlena tu tāḍayet // 13 [AbhT_24.13] suṣumnāntargatenaiva visargeṇa punaḥ punaḥ / tāḍayeta kalāḥ sarvāḥ kampate@sau tataḥ paśuḥ // 14 [AbhT_24.14] utkṣipedvāmahastaṃ vā tatastaṃ yojayetpare / pratyayena vinā mokṣo hyaśraddheyo vimohitaiḥ // 15 [AbhT_24.15] tadarthametaduditaṃ natu mokṣopayogyadaḥ / ityūce parameśaḥ śrīkulagahvaraśāsane // 16 [AbhT_24.16] sādhyo@numeyo mokṣādiḥ pratyayairyadatīndriyaḥ / dīkṣottare ca puryaṣṭavargārpaṇamihoditam // 17 [AbhT_24.17] tadvidhiḥ śrutipatre@bje madhye devaṃ sadāśivam / īśarudraharibrahmacatuṣkaṃ prāgdigāditaḥ // 18 [AbhT_24.18] pūjayitvā śrutisparśau rasaṃ gandhaṃ vapurdvayam / dhyahaṃkṛtī manaśceti brahmādiṣvarpayetkramāt // 19 [AbhT_24.19] eteṣāṃ tarpaṇaṃ kṛtvā śatahomena daiśikaḥ / eṣā sāṃnyāsikī dīkṣā puryaṣṭakaviśodhanī // 20 [AbhT_24.20] puryaṣṭakasyābhāve ca na svarganarakādayaḥ / tathā kṛtvā na kartavyaṃ laukikaṃ kiṃcanāpi hi // 21 [AbhT_24.21] uktaṃ śrīmādhavakule śāsanastho mṛteṣvapi / piṇḍapātodakāsrvādi laukikaṃ parivarjayet // 22 [AbhT_24.22] śivaṃ saṃpūjya cakrārcāṃ yathāśakti samācaret / kramāttridaśamatriṃśatriṃśavatsaravāsare // 23 [AbhT_24.23] ityukto@ntyeṣṭiyāgo@yaṃ parameśvarabhāṣitaḥ // 24 [AbhT_24.24]