Stavacintamani

### Provenance: GRETIL KSTS X (Ksemaraja comm. per ed.) · CC BY-NC-SA 4.0 ### Source file: 4_rellit/saiva/sa_bhaTTanArAyaNa-stavacintAmaNi.txt ### Vendored: site/data/sanskrit/stavacintamani.txt (research/education use; respect licence) sugirā cittahāriṇyā paśyantyā dṛśyamānayā jayaty ullāsitānandamahimā parameśvaraḥ // [BhStc_1] yaḥ sphītaḥ śrīdayābodhaparamānandasampadā vidyoddyotitamāhātmyaḥ sa jayaty aparājitaḥ // [BhStc_2] prasaradbindunādāya śuddhāmṛtamayātmane namo 'nantaprakāśāya śaṃkarakṣīrasindhave // [BhStc_3] dviṣmas tvāṃ tvāṃ stumas tubhyaṃ mantrayāmo 'mbikāpate ativāllabhyataḥ sādhu viśvaṅ no dhṛtavān asi // [BhStc_4] saṃhṛtasparśayogāya sampūrṇāmṛtasūtaye viyanmāyāsvarūpāya vibhave śambhave namaḥ // [BhStc_5] bhinneṣv api na bhinnaṃ yac chinneṣv achinnam eva ca namāmaḥ sarvasāmānyaṃ rūpaṃ tat pārameśvaram // [BhStc_6] praṇavordhvārdhamātrāto 'py aṇave mahate punaḥ brahmāṇḍād api nairguṇyaguṇāya sthāṇave namaḥ // [BhStc_7] brahmāṇḍagarbhiṇīṃ vyomavyāpinaḥ sarvatogateḥ parameśvarahaṃsasya śaktiṃ haṃsīm iva stumaḥ // [BhStc_8] nirupādānasambhāram abhittāv eva tanvate jagaccitraṃ namas tasmai kalāślāghyāya śūline // [BhStc_9] māyājalodarāt samyag uddhṛtya vimalīkṛtam śivajñānaṃ svato dugdhaṃ dehy ehi harahaṃsa naḥ // [BhStc_10] ṣaṭpramāṇīparicchedabhedayoge 'py abhedine paramārthaikabhāvāya baliṃ yāmo bhavāya te // [BhStc_11] api paśyema gambhīrāṃ pareṇa jyotiṣābhitaḥ unmṛṣṭatamasaṃ ramyām antarbhava bhavadguhām // [BhStc_12] namas tebhyo 'pi ye somakalākalitaśekharam nāthaṃ svapne 'pi paśyanti paramānandadāyinam // [BhStc_13] bhagavan bhava bhāvatkaṃ bhāvaṃ bhāvayituṃ ruciḥ punarbhavabhayocchedadakṣā kasmai na rocate // [BhStc_14] yāvajjīvaṃ jagannātha kartavyam idam astu naḥ tvatprasādāt tvadekāgramanaskatvena yā sthitiḥ // [BhStc_15] śākhāsahasravistīrṇavedāgamamayātmane namo 'nantaphalotpādakalpavṛkṣāya śambhave // [BhStc_16] vāṅmanaḥkāyakarmāṇi viniyojya tvayi prabho tvanmayībhūya nirdvandvāḥ kaccit syāmāpi karhicit // [BhStc_17] jagatāṃ sargasaṃhāratattaddhitaniyuktiṣu ananyāpekṣasāmarthyaśālini śūline namaḥ // [BhStc_18] vyatītaguṇayogasya mukhyadhyeyasya dhūrjaṭeḥ nāmāpi dhyāyatāṃ dhyānaiḥ kim anyālambanaiḥ phalam // [BhStc_19] namo namaḥ śivāyeti mantrasāmarthyam āśritāḥ ślāghyās te śāmbhavīṃ bhūtim upabhoktuṃ ya udyatāḥ // [BhStc_20] kaḥ panthā yena na prāpyaḥ kā ca vāṅ nocyase yayā kiṃ dhyānaṃ yena na dhyeyaḥ kiṃ vā kiṃ nāsi yat prabho // [BhStc_21] arcito 'yam ayaṃ dhyāta eṣa toṣita ity ayam rasaḥ srotaḥsahasreṇa tvayi me bhava vardhatām // [BhStc_22] namo niḥśeṣadhīpatrimālālayamayātmane nāthāya sthāṇave tubhyaṃ nāgayajñopavītine // [BhStc_23] ajñānatimirasyaikam auṣadhaṃ saṃsmṛtis tava bhava tattatpradānena prasādaḥ kriyatāṃ mayi // [BhStc_24] nama īśāya niḥśeṣapuruṣārthaprasādhakaḥ praṇantavyaḥ praṇāmo 'pi yadīya iha dhīmatām // [BhStc_25] magnair bhīme bhavāmbhodhau nilaye duḥkhayādasām bhakticintāmaṇiṃ śārvaṃ tataḥ prāpya na kiṃ jitam // [BhStc_26] nirāvaraṇanirdvandvaniścalajñānasampadām jñeyo 'si kila ke 'py ete ye tvāṃ jānanti dhūrjaṭe // [BhStc_27] nirguṇo 'pi guṇajñānāṃ jñeya eko jayaty ajaḥ niṣkāmo 'pi prakṛtyā yaḥ kāmanānāṃ paraṃ phalam // [BhStc_28] śrīratnāmṛtalābhāya kliṣṭaṃ yatra na kaiḥ suraiḥ tat kṣīrodadam aiśvaryaṃ tavaiva sahajaṃ vibho // [BhStc_29] namo bhaktyā nṛṇāṃ muktyai bhavate bhava te 'vate smṛtyā nutyā ca dadate śambhave śaṃ bhave 'bhave // [BhStc_30] sarvajñaḥ sarvakṛt sarvam asīti jñānaśālinām vedyaṃ kiṃ karma vā nātha nānantyāya tvayārpyate // [BhStc_31] icchāyā eva yasyeyat phalaṃ lokatrayātmakam tasya te nātha kāryāṇāṃ ko vetti kiyatī gatiḥ // [BhStc_32] brahmādayo 'pi tad yasya karmasopānamālayā upary upari dhāvanti labdhuṃ dhāma namāmi tam // [BhStc_33] ayaṃ brahmā mahendro 'yaṃ sūryācandramasāv imau iti śaktilatā yasya puṣpitā pātv asau bhavaḥ // [BhStc_34] bhramo na labhyate yasya bhrāntāntaḥkaraṇair api dūragair api yasyānto durgam astaṃ stumo mṛḍam // [BhStc_35] namaḥ stutau smṛtau dhyāne darśane sparśane tathā prāptau cānandavṛndāya dayitāya kapardine // [BhStc_36] kiṃ smayeneti matvāpi manasā parameśvara smayena tvanmayo 'smīti māmi nātmani kiṃ mudā // [BhStc_37] cintayitvāpi kartavyakoṭīś cittasya cāpalāt viśrāmyan bhava bhāvatkacittānande rame bhṛśam // [BhStc_38] sūkṣmo 'pi cet trilokīyaṃ kalāmātraṃ kathaṃ tava sthūlo 'tha kiṃ sudarśo na brahmādibhir api prabho // [BhStc_39] vācya eṣāṃ tvam eveti nābhaviṣyad idaṃ yadi kaḥ kleśaṃ deva vāgjāleṣv akariṣyat sudhīs tadā // [BhStc_40] krameṇa karmaṇā kena kayā vā prajñayā prabho dṛśyo 'sīty upadeśena prasādaḥ kriyatāṃ mama // [BhStc_41] namo nirupakāryāya trailokyaikopakāriṇe sarvasya spṛhaṇīyāya niḥspṛhāya kapardine // [BhStc_42] aho kṣetrajñatā seyaṃ kāryāya mahate satām yayānantaphalāṃ bhaktiṃ vapanti tvayy amī prabho // [BhStc_43] mahatīyam aho māyā tava māyin yayāvṛtaḥ tvaddhyānanidhilābhe 'pi mugdho lokaḥ ślathāyate // [BhStc_44] ārambhe bhava sarvatra karma vā karaṇādi vā viśvam astu svatantras tu kartā tatraikako bhavān // [BhStc_45] triguṇatriparispandadvandvagrastaṃ jagattrayam uddhartuṃ bhavato 'nyasya kasya śaktiḥ kṛpāthavā // [BhStc_46] doṣo 'pideva ko doṣas tvām āptuṃ yaḥ samāsthitaḥ guṇo 'pi ca guṇaḥ ko nu tvāṃ nāptuṃ yaḥ samāsthitaḥ // [BhStc_47] rāgo 'py astu jagannātha mama tvayy eva yaḥ sthitaḥ lobhāyāpi namas tasmai tvallābhālambanāya me // [BhStc_47] aho mahad idaṃ karma deva tvadbhāvanātmakam ābrahmakrimi yasmin no muktaye 'dhikriyeta kaḥ // [BhStc_48] ārambhaḥ sarvakāryāṇāṃ paryantaḥ sarvakarmaṇām tadantarvṛttayaś citrās tavaiveśo dhiyaḥ pathi // [BhStc_49] yāvad uttaram āsvādasahasraguṇavistaraḥ tvadbhaktirasapīyūṣān nātha nānyatra dṛśyate // [BhStc_50] upasaṃhṛtakāmāya kāmāyatim atanvate avataṃsitasomāya somāya svāmine namaḥ // [BhStc_51] kim aśaktaḥ karomīti sarvatrānadhyavasyataḥ sarvānugrāhikā śaktiḥ śāṃkarī śaraṇaṃ mama // [BhStc_52] guṇātītasya nirdiṣṭaniḥśeṣātiśayātmanaḥ labhyate bhava kutrāṃśe paraḥ pratinidhis tava // [BhStc_53] nirdvandve nirupādhau ca tvayy ātmani sati prabho vayaṃ vañcyāmahe 'dyāpi māyayāmeyayā tava // [BhStc_54] aṇimādiguṇāvāptiḥ sadaiśvaryaṃ bhavakṣayaḥ amī bhava bhavadbhaktikalpapādapapallavāḥ // [BhStc_55] yā yā dik tatra na kvāsi sarvaḥ kālo bhavanmayaḥ iti labdho 'pi karhi tvaṃ lapsyase nātha kathyatām // [BhStc_56] namaḥ prasannasadvṛttamānasaikanivāsine bhūribhūtisitāṅgāya mahāhaṃsāya śambhave // [BhStc_57] hṛtoddhatatamastāntiḥ pluṣṭāśeṣabhavendhanā tvadbodhadīpikā me 'stu nātha tvadbhaktidīpikā // [BhStc_58] visṛṣṭānekasadbījagarbhaṃ trailokyanāṭakam prastāvya hara saṃhartuṃ tvattaḥ ko 'nyaḥ kaviḥ kṣamaḥ // [BhStc_59] namaḥ sadasatāṃ kartum asattvaṃ sattvam eva vā svatantrāyāsvatantrāya vyayaiśvaryaikaśāline // [BhStc_60] trailokye 'py atra yo yāvān ānandaḥ kaścid īkṣyate sa bindur yasya taṃ vande devam ānandasāgaram // [BhStc_61] aho brahmādayo dhanyā ye vimuktānyasaṃkatham namo namaḥ śivāyeti japanty āhlādavihvalāḥ // [BhStc_62] niṣkāmāyāpi kāmānām anantānāṃ vidhāyine anāditve 'pi viśvasya bhoktre bhava namo 'stu te // [BhStc_63] stumas tribhuvanārambhamūlaprakṛtim īśvaram lipseran nopakāraṃ ke yataḥ sampūrṇadharmaṇaḥ // [BhStc_64] mahatsv apy arthakṛcchreṣu mohaughamalinīkṛtāḥ smṛte yasmin prasīdanti matayas taṃ śivaṃ stumaḥ // [BhStc_65] prabho bhavata eveha prabhuśaktir abhaṅgurā yadicchayā pratāyete trailokyasya layodayau // [BhStc_66] kukarmāpi yam uddiśya devaṃ syāt sukṛtaṃ param sukṛtasyāpi saukṛtyaṃ yato 'nyatra na so 'si bhoḥ // [BhStc_67] eṣa muṣṭyā gṛhīto 'si dṛṣṭa eṣa kva yāsi naḥ iti bhaktirasādhmātā dhanyā dhāvanti dhūrjaṭim // [BhStc_68] stumas tvām ṛgyajuḥsāmnāṃ śukrataḥ parataḥ param yasya vedātmikājñeyam aho gambhīrasundarī // [BhStc_69] vidhir ādis tathānto 'si viśvasya parameśvara dharmagrāmaḥ pravṛtto yas tvatto na sa kuto bhavet // [BhStc_70] namas te bhavasambhrāntabhrāntim udbhāvya bhindate jñānānandaṃ ca nirdvandvaṃ deva vṛtvā vivṛṇvate // [BhStc_71] yasyāḥ prāpyeta paryantaviśeṣaḥ kair manorathaiḥ māyām ekanimeṣeṇa muṣṇaṃs tāṃ pātu naḥ śivaḥ // [BhStc_72] vairāgyasya gatiṃ gurvīṃ jñānasya paramāṃ śriyam naiḥspṛhyasya parāṃ koṭiṃ bibhratāṃ tvaṃ prabho prabhuḥ // [BhStc_73] brahmaṇo 'pi bhavān brahma kasya neśas tvam īśituḥ jagatkalyāṇakalyāṇaṃ kiyat tvam iti vetti kaḥ // [BhStc_74] kim anyair bandhubhiḥ kiṃ ca suhṛdbhiḥ svāmibhis tathā sarvasthāne mameśa tvaṃ ya uddhartā bhavārṇavāt // [BhStc_75] jayanti mohamāyādimalasaṃkṣālanakṣamāḥ śaivayogabalākṛṣṭā divyapīyūṣavipruṣaḥ // [BhStc_76] gāyatryā gīyate yasya dhiyāṃ tejaḥ pracodakam codayed api kaccin naḥ sa dhiyaḥ satpathe prabhuḥ // [BhStc_77] aṣṭamūrte kim ekasyām api mūrtau na naḥ sthitim śāśvatīṃ kuruṣe yad vā tuṣṭaḥ sarvaṃ kariṣyasi // [BhStc_78] vastutattvaṃ padārthānāṃ prāyeṇārthakriyākaram bhavatas tv īśa nāmāpi mokṣaparyantasiddhidam // [BhStc_79] muhur muhur jagaccitrasy-ānyānyāṃ sthitim ūhitum śaktir yā te tayā nātha ko manasvī na vismitaḥ // [BhStc_80] duṣkaraṃ sukarīkartuṃ duḥkhaṃ sukhayituṃ tathā ekavīrā smṛtir yasya taṃ smarāmaḥ smaradviṣam // [BhStc_81] jayanti gītayo yāsāṃ sa geyaḥ parameśvaraḥ yannāmnāpi mahātmānaḥ kīryante pulakāṅkuraiḥ // [BhStc_82] bhavān iva bhavān eva bhaved yadi paraṃ bhava svaśaktivyūhasaṃvyūḍhatrailokyārambhasaṃhṛtiḥ // [BhStc_83] mantro 'si mantraṇīyo 'si mantrī tvattaḥ kuto 'paraḥ sa mahyaṃ dehi taṃ mantraṃ tvanmantraḥ syāṃ yathā prabho // [BhStc_84] bhārūpaḥ satyasaṃkalpas tvam ātmā yasya so 'py aham saṃsārīti kim īśaiṣa svapnaḥ so 'pi kutas tvayi // [BhStc_85] tad abhaṅgi tad agrāmyaṃ tad ekam upapattimat tvayi karmaphalanyāsakṛtām aiśvaryam īśa yat // [BhStc_86] kṣamaḥ kāṃ nāpadaṃ hantuṃ kāṃ dātuṃ sampadaṃ na vā yo 'sau sa dayito 'smākaṃ devadevo vṛṣadhvajaḥ // [BhStc_87] māyāmayamalāndhasya divyasya jñānacakṣuṣaḥ nirmalīkaraṇe nātha tvadbhaktiḥ paramāñjanam // [BhStc_88] nirbhayaṃ yad yad ānandamayam ekaṃ yad avyayam padaṃ dehy ehi me deva tūrṇaṃ tat kiṃ pratīkṣase // [BhStc_89] aho nisargagambhīro ghoraḥ saṃsārasāgaraḥ aho tattaraṇopāyaḥ paraḥ ko 'pi maheśvaraḥ // [BhStc_90] namaḥ kṛtakṛtāntānta tubhyaṃ madanamardine mastakanyastagaṅgāya yathāyuktārthakāriṇe // [BhStc_91] aiśvaryajñānavairāgyadharmebhyo 'py upari sthitim nātha prārthayamānānāṃ tvad ṛte kā parā gatiḥ // [BhStc_92] tvayy anicchati kaḥ śambho śaktaḥ kubjayituṃ tṛṇam tvadicchānugṛhītas tu vahed brāhmīṃ dhuraṃ na kaḥ // [BhStc_93] harapraṇatimāṇikyamukuṭotkaṭamastakāḥ nameyuḥ kaṃ paraṃ kaṃ vā namayeyur na dhīdhanāḥ // [BhStc_94] sarvavibhramanirmokaniṣkampam amṛtahradam bhavajjñānāmbudher madhyam adhyāsīyāpi dhūrjaṭe // [BhStc_95] citraṃ yac citradṛṣṭo 'pi manorathagato 'pi vā paramārthaphalaṃ nātha paripūrṇaṃ prayacchasi // [BhStc_96] ko guṇair adhikas tvattas tvattaḥ ko nirguṇo 'dhikaḥ iti nātha numaḥ kiṃ tvāṃ kiṃ nindāmo na manmahe // [BhStc_97] kīrtane 'py amṛtaughasya yatprasatteḥ phalaṃ tava tat pātum api ko 'nyo 'laṃ kim u dātuṃ jagatpate // [BhStc_98] niḥśeṣaprārthanīyārthasārthasiddhinidhānataḥ tvattas tvadbhaktim evāptuṃ prārthaye nātha sarvathā // [BhStc_99] namas trailokyanāthāya tubhyaṃ bhava bhavajjuṣām trilokīnāthatādānanirvināyakaśaktaye // [BhStc_100] niḥśeṣakleśahānasya hetuḥ ka iti saṃśaye svāmin so 'sīti niścitya kas tvāṃ na śaraṇaṃ gataḥ // [BhStc_101] bhuktvā bhogān bhavabhrāntiṃ hitvā lapsye paraṃ padam ity āśaṃseha śobheta śambhau bhaktimataḥ param // [BhStc_102] nātha svapne 'pi yat kuryāṃ brūyāṃ vā sādhv asādhu vā tvadadhīnatvadarpeṇa sarvatrātrāsmi nirvṛtaḥ // [BhStc_103] jyotiṣām api yaj jyotis tatra tvaddhāmni dhāvataḥ cittasyeśa tamaḥsparśo manye vandhyātmajānujaḥ // [BhStc_104] manye nyastapadaḥ so 'pi kṣemye mokṣasya vartmani manorathaḥ sthito yasya seviṣye śivam ity ayam // [BhStc_105] sthityutpattilayair lokatrayasyopakriyāsv iha ekaiveśa bhavacchaktiḥ svatantraṃ tantram īkṣase // [BhStc_106] trilokyām iha kas trātas tritāpyā nopatāpitaḥ tasmai namo 'stu te yas tvaṃ tannirvāṇāmṛtahradaḥ // [BhStc_107] kṛtrimāpi bhavadbhaktir akṛtrimaphalodayā niśchadmā ced bhaved eṣā kiṃphaleti tvayocyatām // [BhStc_108] tac cakṣur īkṣyase yena sā gatir gamyase yayā phalaṃ tad aja jātaṃ yat tvatkathākalpapādapāt // [BhStc_109] śreyasā śreya evaitad upari tvayi yā sthitiḥ tadantarāyahṛtaye tvam īśa śaraṇaṃ mama // [BhStc_110] aho svādutamaḥ śarvasevāśaṃsāsudhārasaḥ kutra kālakalāmātre na yo navanavāyate // [BhStc_111] muhur muhur aviśrāntas trailokyaṃ kalpanāśataiḥ kalpayann api ko 'py eko nirvikalpo jayaty ajaḥ // [BhStc_112] malatailāktasaṃsāravāsanāvartidāhinā jñānadīpena deva tvāṃ kadā nu syām upasthitaḥ // [BhStc_113] nimeṣam api yady ekaṃ kṣīṇadoṣe kariṣyasi padaṃ citte tadā śambho kiṃ na sampādayiṣyasi // [BhStc_114] dhanyo 'smi kṛtakṛtyo 'smi mahān asmīti bhāvanā bhavet sālambanā tasya yas tvadālambanaḥ prabho // [BhStc_115] śubhāśubhasya sarvasya svayaṃ kartā bhavān api bhavadbhaktis tu jananī śubhasyaiveśa kevalam // [BhStc_116] prasanne manasi svāmin kiṃ tvaṃ niviśase kim u tvatpraveśāt prasīdet tad iti dolāyate janaḥ // [BhStc_117] niścayaḥ punar eṣo 'tra tvadadhiṣṭhānam eva hi prasādo manasaḥ svāmin sā siddhis tat paraṃ padam // [BhStc_118] vacaś cetaś ca kāryaṃ ca śarīraṃ mama yat prabho tvatprasādena tad bhūyād bhavadbhāvaikabhūṣaṇam // [BhStc_119] stavacintāmaṇiṃ bhūrimanorathaphalapradam bhaktilakṣmyālayaṃ śambho bhaṭṭanārāyaṇo vyadhāt // [BhStc_120] sugirā cittahāriṇyā paśyantyā dṛśyamānayā | jayati+ullāsitānandamahimā parameśvaraḥ || [BhStc_1-paus] yas+sphītas+śrīdayābodhaparamānandasampadā | vidyoddyotitamāhātmyas+sa jayati+aparājitaḥ || [BhStc_2-paus] prasaradbindunādāya śuddhāmṛtamayātmane | namas+anantaprakāśāya śaṃkarakṣīrasindhave || [BhStc_3-paus] dviṣmas+tvām+tvām+stumas+tubhyam+mantrayāmas+ambikāpate | ativāllabhyatas+sādhu viśvak+no dhṛtavān+asi || [BhStc_4-paus] saṃhṛtasparśayogāya sampūrṇāmṛtasūtaye | viyanmāyāsvarūpāya vibhave śambhave namaḥ || [BhStc_5-paus] bhinneṣu+api na bhinnam+yat+chinneṣu+achinnam+eva ca | namāmas+sarvasāmānyam+rūpam+tat+pārameśvaram || [BhStc_6-paus] praṇavordhvārdhamātrātas+api+aṇave mahate punaḥ | brahmāṇḍāt+api nairguṇyaguṇāya sthāṇave namaḥ || [BhStc_7-paus] brahmāṇḍagarbhiṇīm+vyomavyāpinas+sarvatogateḥ | parameśvarahaṃsasya śaktim+haṃsīm+iva stumaḥ || [BhStc_8-paus] nirupādānasambhāram+abhittau+eva tanvate | jagaccitram+namas+tasmai kalāślāghyāya śūline || [BhStc_9-paus] māyājalodarāt+samyak+uddhṛtya vimalīkṛtam | śivajñānam+svatas+dugdham+dehi+ehi harahaṃsa naḥ || [BhStc_10-paus] ṣaṭpramāṇīparicchedabhedayoge+api+abhedine | paramārthaikabhāvāya balim+yāmas+bhavāya te || [BhStc_11-paus] api paśyema gambhīrām+pareṇa jyotiṣā+abhitaḥ | unmṛṣṭatamasam+ramyām+antarbhava bhavadguhām || [BhStc_12-paus] namas+tebhyas+api ye somakalākalitaśekharam | nātham+svapne+api paśyanti paramānandadāyinam || [BhStc_13-paus] bhagavan+bhava bhāvatkam+bhāvam+bhāvayitum+ruciḥ | punarbhavabhayocchedadakṣā kasmai na rocate || [BhStc_14-paus] yāvajjīvam+jagannātha kartavyam+idam+astu naḥ | tvatprasādāt+tvadekāgramanaskatvena yā sthitiḥ || [BhStc_15-paus] śākhāsahasravistīrṇavedāgamamayātmane | namas+anantaphalotpādakalpavṛkṣāya śambhave || [BhStc_16-paus] vāṅmanaḥkāyakarmāṇi viniyojya tvayi prabho | tvanmayībhūya nirdvandvās+kaccit+syāma+api karhicit || [BhStc_17-paus] jagatām+sargasaṃhāratattaddhitaniyuktiṣu | ananyāpekṣasāmarthyaśālini śūline namaḥ || [BhStc_18-paus] vyatītaguṇayogasya mukhyadhyeyasya dhūrjaṭeḥ | nāma+api dhyāyatām+dhyānais+kim+anyālambanais+phalam || [BhStc_19-paus] namas+namas+śivāya+iti mantrasāmarthyam+āśritāḥ | ślāghyās+te śāmbhavīm+bhūtim+upabhoktum+ye+udyatāḥ || [BhStc_20-paus] kas+panthās+yena na prāpyas+kā ca vāk+na+ucyase yayā | kim+dhyānam+yena na dhyeyas+kim+vā kim+na+asi yat+prabho || [BhStc_21-paus] arcitas+ayam+ayam+dhyātas+eṣa toṣitas+iti+ayam | rasas+srotaḥsahasreṇa tvayi me bhava vardhatām || [BhStc_22-paus] namas+niḥśeṣadhīpatrimālālayamayātmane | nāthāya sthāṇave tubhyam+nāgayajñopavītine || [BhStc_23-paus] ajñānatimirasya+ekam+auṣadham+saṃsmṛtis+tava | bhava tattatpradānena prasādas+kriyatām+mayi || [BhStc_24-paus] namas+īśāya niḥśeṣapuruṣārthaprasādhakaḥ | praṇantavyas+praṇāmas+api yadīyas+iha dhīmatām || [BhStc_25-paus] magnais+bhīme bhavāmbhodhau nilaye duḥkhayādasām | bhakticintāmaṇim+śārvam+tatas+prāpya na kim+jitam || [BhStc_26-paus] nirāvaraṇanirdvandvaniścalajñānasampadām | jñeyas+asi kila ke+api+ete ye tvām+jānanti dhūrjaṭe || [BhStc_27-paus] nirguṇas+api guṇajñānām+jñeyas+ekas+jayati+ajaḥ | niṣkāmas+api prakṛtyā yas+kāmanānām+param+phalam || [BhStc_28-paus] śrīratnāmṛtalābhāya kliṣṭam+yatra na kais+suraiḥ | tat+kṣīrodadam+aiśvaryam+tava+eva sahajam+vibho || [BhStc_29-paus] namas+bhaktyā nṛṇām+muktyai bhavate bhava te+avate | smṛtyā nutyā ca dadate śambhave śam+bhave+abhave || [BhStc_30-paus] sarvajñas+sarvakṛt+sarvam+asi+iti jñānaśālinām | vedyam+kim+karma vā nātha na+ānantyāya tvayā+arpyate || [BhStc_31-paus] icchāyās+eva yasya+iyat+phalam+lokatrayātmakam | tasya te nātha kāryāṇām+kas+vetti kiyatī gatiḥ || [BhStc_32-paus] brahmādayas+api tat+yasya karmasopānamālayā | upari+upari dhāvanti labdhum+dhāma namāmi tam || [BhStc_33-paus] ayam+brahmā mahendras+ayam+sūryācandramasau+imau | iti śaktilatā yasya puṣpitā pātu+asau bhavaḥ || [BhStc_34-paus] bhramas+na labhyate yasya bhrāntāntaḥkaraṇais+api | dūragais+api yasya+antas+durgam+astam+stumas+mṛḍam || [BhStc_35-paus] namas+stutau smṛtau dhyāne darśane sparśane tathā | prāptau ca+ānandavṛndāya dayitāya kapardine || [BhStc_36-paus] kim+smayena+iti matvā+api manasā parameśvara | smayena tvanmayas+asmi+iti māmi na+ātmani kim+mudā || [BhStc_37-paus] cintayitvā+api kartavyakoṭīs+cittasya cāpalāt | viśrāmyan+bhava bhāvatkacittānande rame bhṛśam || [BhStc_38-paus] sūkṣmas+api cet+trilokī+iyam+kalāmātram+katham+tava | sthūlas+atha kim+sudarśas+na brahmādibhis+api prabho || [BhStc_39-paus] vācyas+eṣām+tvam+eva+iti na+abhaviṣyat+idam+yadi | kas+kleśam+deva vāgjāleṣu+akariṣyat+sudhīs+tadā || [BhStc_40-paus] krameṇa karmaṇā kena kayā vā prajñayā prabho | dṛśyas+asi+iti+upadeśena prasādas+kriyatām+mama || [BhStc_41-paus] namas+nirupakāryāya trailokyaikopakāriṇe | sarvasya spṛhaṇīyāya niḥspṛhāya kapardine || [BhStc_42-paus] aho kṣetrajñatā sā+iyam+kāryāya mahate satām | yayā+anantaphalām+bhaktim+vapanti tvayi+amī prabho || [BhStc_43-paus] mahatī+iyam+aho māyā tava māyin+yayā+āvṛtaḥ | tvaddhyānanidhilābhe+api mugdhas+lokas+ślathāyate || [BhStc_44-paus] ārambhe bhava sarvatra karma vā karaṇādi vā | viśvam+astu svatantras+tu kartā tatra+ekakas+bhavān || [BhStc_45-paus] triguṇatriparispandadvandvagrastam+jagattrayam | uddhartum+bhavatas+anyasya kasya śaktis+kṛpā+athavā || [BhStc_46-paus] doṣas+apideva kas+doṣas+tvām+āptum+yas+samāsthitaḥ | guṇas+api ca guṇas+kas+nu tvām+na+āptum+yas+samāsthitaḥ || [BhStc_47-paus] rāgas+api+astu jagannātha mama tvayi+eva yas+sthitaḥ | lobhāya+api namas+tasmai tvallābhālambanāya me || [BhStc_47-paus] aho mahat+idam+karma deva tvadbhāvanātmakam | ābrahmakrimi yasmin+no muktaye+adhikriyeta kaḥ || [BhStc_48-paus] ārambhas+sarvakāryāṇām+paryantas+sarvakarmaṇām | tadantarvṛttayas+citrās+tava+eva+īśas+dhiyas+pathi || [BhStc_49-paus] yāvat+uttaram+āsvādasahasraguṇavistaraḥ | tvadbhaktirasapīyūṣāt+nātha na+anyatra dṛśyate || [BhStc_50-paus] upasaṃhṛtakāmāya kāmāyatim+atanvate | avataṃsitasomāya somāya svāmine namaḥ || [BhStc_51-paus] kim+aśaktas+karomi+iti sarvatra+anadhyavasyataḥ | sarvānugrāhikā śaktis+śāṃkarī śaraṇam+mama || [BhStc_52-paus] guṇātītasya nirdiṣṭaniḥśeṣātiśayātmanaḥ | labhyate bhava kutra+aṃśe paras+pratinidhis+tava || [BhStc_53-paus] nirdvandve nirupādhau ca tvayi+ātmani sati prabho | vayam+vañcyāmahe+adya+api māyayā+ameyayā tava || [BhStc_54-paus] aṇimādiguṇāvāptis+sadā+aiśvaryam+bhavakṣayaḥ | amī bhava bhavadbhaktikalpapādapapallavāḥ || [BhStc_55-paus] yā yā dik+tatra na kva+asi sarvas+kālas+bhavanmayaḥ | iti labdhas+api karhi tvam+lapsyase nātha kathyatām || [BhStc_56-paus] namas+prasannasadvṛttamānasaikanivāsine | bhūribhūtisitāṅgāya mahāhaṃsāya śambhave || [BhStc_57-paus] hṛtoddhatatamastāntis+pluṣṭāśeṣabhavendhanā | tvadbodhadīpikā me+astu nātha tvadbhaktidīpikā || [BhStc_58-paus] visṛṣṭānekasadbījagarbham+trailokyanāṭakam | prastāvya hara saṃhartum+tvattas+kas+anyas+kavis+kṣamaḥ || [BhStc_59-paus] namas+sadasatām+kartum+asattvam+sattvam+eva vā | svatantrāya+asvatantrāya vyayaiśvaryaikaśāline || [BhStc_60-paus] trailokye+api+atra yas+yāvān+ānandas+kaścit+īkṣyate | sa bindus+yasya tam+vande devam+ānandasāgaram || [BhStc_61-paus] aho brahmādayas+dhanyās+ye vimuktānyasaṃkatham | namas+namas+śivāya+iti japanti+āhlādavihvalāḥ || [BhStc_62-paus] niṣkāmāya+api kāmānām+anantānām+vidhāyine | anāditve+api viśvasya bhoktre bhava namas+astu te || [BhStc_63-paus] stumas+tribhuvanārambhamūlaprakṛtim+īśvaram | lipseran+na+upakāram+ke yatas+sampūrṇadharmaṇaḥ || [BhStc_64-paus] mahatsu+api+arthakṛcchreṣu mohaughamalinīkṛtāḥ | smṛte yasmin+prasīdanti matayas+tam+śivam+stumaḥ || [BhStc_65-paus] prabho bhavatas+eva+iha prabhuśaktis+abhaṅgurā | yadicchayā pratāyete trailokyasya layodayau || [BhStc_66-paus] kukarmā+api yam+uddiśya devam+syāt+sukṛtam+param | sukṛtasya+api saukṛtyam+yatas+anyatra na sas+asi bhoḥ || [BhStc_67-paus] eṣa muṣṭyā gṛhītas+asi dṛṣṭas+eṣa kva yāsi naḥ | iti bhaktirasādhmātās+dhanyās+dhāvanti dhūrjaṭim || [BhStc_68-paus] stumas+tvām+ṛgyajuḥsāmnām+śukratas+paratas+param | yasya vedātmikājñeyam+aho gambhīrasundarī || [BhStc_69-paus] vidhis+ādis+tathā+antas+asi viśvasya parameśvara | dharmagrāmas+pravṛttas+yas+tvattas+na sa kutas+bhavet || [BhStc_70-paus] namas+te bhavasambhrāntabhrāntim+udbhāvya bhindate | jñānānandam+ca nirdvandvam+deva vṛtvā vivṛṇvate || [BhStc_71-paus] yasyās+prāpyeta paryantaviśeṣas+kais+manorathaiḥ | māyām+ekanimeṣeṇa muṣṇan+tām+pātu nas+śivaḥ || [BhStc_72-paus] vairāgyasya gatim+gurvīm+jñānasya paramām+śriyam | naiḥspṛhyasya parām+koṭim+bibhratām+tvam+prabho prabhuḥ || [BhStc_73-paus] brahmaṇas+api bhavān+brahma kasya na+īśas+tvam+īśituḥ | jagatkalyāṇakalyāṇam+kiyat+tvam+iti vetti kaḥ || [BhStc_74-paus] kim+anyais+bandhubhis+kim+ca suhṛdbhis+svāmibhis+tathā | sarvasthāne mama+īśa tvam+yas+uddhartā bhavārṇavāt || [BhStc_75-paus] jayanti mohamāyādimalasaṃkṣālanakṣamāḥ | śaivayogabalākṛṣṭās+divyapīyūṣavipruṣaḥ || [BhStc_76-paus] gāyatryā gīyate yasya dhiyām+tejas+pracodakam | codayet+api kaccit+nas+sa dhiyas+satpathe prabhuḥ || [BhStc_77-paus] aṣṭamūrte kim+ekasyām+api mūrtau na nas+sthitim | śāśvatīm+kuruṣe yat+vā tuṣṭas+sarvam+kariṣyasi || [BhStc_78-paus] vastutattvam+padārthānām+prāyeṇa+arthakriyākaram | bhavatas+tu+īśa nāma+api mokṣaparyantasiddhidam || [BhStc_79-paus] muhus+muhus+jagaccitrasya+anyānyām+sthitim+ūhitum | śaktis+yā te tayā nātha kas+manasvī na vismitaḥ || [BhStc_80-paus] duṣkaram+sukarīkartum+duḥkham+sukhayitum+tathā | ekavīrā smṛtis+yasya tam+smarāmas+smaradviṣam || [BhStc_81-paus] jayanti gītayas+yāsām+sa geyas+parameśvaraḥ | yannāmnā+api mahātmānas+kīryante pulakāṅkuraiḥ || [BhStc_82-paus] bhavān+iva bhavān+eva bhavet+yadi param+bhava | svaśaktivyūhasaṃvyūḍhatrailokyārambhasaṃhṛtiḥ || [BhStc_83-paus] mantras+asi mantraṇīyas+asi mantrī tvattas+kutas+aparaḥ | sa mahyam+dehi tam+mantram+tvanmantras+syām+yathā prabho || [BhStc_84-paus] bhārūpas+satyasaṃkalpas+tvam+ātmā yasya sas+api+aham | saṃsārī+iti kim+īśa+eṣa svapnas+sas+api kutas+tvayi || [BhStc_85-paus] tat+abhaṅgi tat+agrāmyam+tat+ekam+upapattimat | tvayi karmaphalanyāsakṛtām+aiśvaryam+īśa yat || [BhStc_86-paus] kṣamas+kām+na+āpadam+hantum+kām+dātum+sampadam+na vā | yas+asau sa dayitas+asmākam+devadevas+vṛṣadhvajaḥ || [BhStc_87-paus] māyāmayamalāndhasya divyasya jñānacakṣuṣaḥ | nirmalīkaraṇe nātha tvadbhaktis+paramāñjanam || [BhStc_88-paus] nirbhayam+yat+yat+ānandamayam+ekam+yat+avyayam | padam+dehi+ehi me deva tūrṇam+tat+kim+pratīkṣase || [BhStc_89-paus] aho nisargagambhīras+ghoras+saṃsārasāgaraḥ | aho tattaraṇopāyas+paras+kas+api maheśvaraḥ || [BhStc_90-paus] namas+kṛtakṛtāntānta tubhyam+madanamardine | mastakanyastagaṅgāya yathāyuktārthakāriṇe || [BhStc_91-paus] aiśvaryajñānavairāgyadharmebhyas+api+upari sthitim | nātha prārthayamānānām+tvat+ṛte kā parā gatiḥ || [BhStc_92-paus] tvayi+anicchati kas+śambho śaktas+kubjayitum+tṛṇam | tvadicchānugṛhītas+tu vahet+brāhmīm+dhuram+na kaḥ || [BhStc_93-paus] harapraṇatimāṇikyamukuṭotkaṭamastakāḥ | nameyus+kam+param+kam+vā namayeyus+na dhīdhanāḥ || [BhStc_94-paus] sarvavibhramanirmokaniṣkampam+amṛtahradam | bhavajjñānāmbudhes+madhyam+adhyāsīya+api dhūrjaṭe || [BhStc_95-paus] citram+yat+citradṛṣṭas+api manorathagatas+api vā | paramārthaphalam+nātha paripūrṇam+prayacchasi || [BhStc_96-paus] kas+guṇais+adhikas+tvattas+tvattas+kas+nirguṇas+adhikaḥ | iti nātha numas+kim+tvām+kim+nindāmas+na manmahe || [BhStc_97-paus] kīrtane+api+amṛtaughasya yatprasattes+phalam+tava | tat+pātum+api kas+anyas+alam+kim+u dātum+jagatpate || [BhStc_98-paus] niḥśeṣaprārthanīyārthasārthasiddhinidhānataḥ | tvattas+tvadbhaktim+eva+āptum+prārthaye nātha sarvathā || [BhStc_99-paus] namas+trailokyanāthāya tubhyam+bhava bhavajjuṣām | trilokīnāthatādānanirvināyakaśaktaye || [BhStc_100-paus] niḥśeṣakleśahānasya hetus+kas+iti saṃśaye | svāmin+sas+asi+iti niścitya kas+tvām+na śaraṇam+gataḥ || [BhStc_101-paus] bhuktvā bhogān+bhavabhrāntim+hitvā lapsye param+padam | iti+āśaṃsā+iha śobheta śambhau bhaktimatas+param || [BhStc_102-paus] nātha svapne+api yat+kuryām+brūyām+vā sādhu+asādhu vā | tvadadhīnatvadarpeṇa sarvatra+atra+asmi nirvṛtaḥ || [BhStc_103-paus] jyotiṣām+api yat+jyotis+tatra tvaddhāmni dhāvataḥ | cittasya+īśa tamaḥsparśas+manye vandhyātmajānujaḥ || [BhStc_104-paus] manye nyastapadas+sas+api kṣemye mokṣasya vartmani | manorathas+sthitas+yasya seviṣye śivam+iti+ayam || [BhStc_105-paus] sthityutpattilayais+lokatrayasya+upakriyāsu+iha | ekā+eva+īśa bhavacchaktis+svatantram+tantram+īkṣase || [BhStc_106-paus] trilokyām+iha kas+trātas+tritāpyā na+upatāpitaḥ | tasmai namas+astu te yas+tvam+tannirvāṇāmṛtahradaḥ || [BhStc_107-paus] kṛtrimā+api bhavadbhaktis+akṛtrimaphalodayā | niśchadmā cet+bhavet+eṣā kiṃphalā+iti tvayā+ucyatām || [BhStc_108-paus] tat+cakṣus+īkṣyase yena sā gatis+gamyase yayā | phalam+tat+aja jātam+yat+tvatkathākalpapādapāt || [BhStc_109-paus] śreyasā śreyas+eva+etat+upari tvayi yā sthitiḥ | tadantarāyahṛtaye tvam+īśa śaraṇam+mama || [BhStc_110-paus] aho svādutamas+śarvasevāśaṃsāsudhārasaḥ | kutra kālakalāmātre na yas+navanavāyate || [BhStc_111-paus] muhus+muhus+aviśrāntas+trailokyam+kalpanāśataiḥ | kalpayan+api kas+api+ekas+nirvikalpas+jayati+ajaḥ || [BhStc_112-paus] malatailāktasaṃsāravāsanāvartidāhinā | jñānadīpena deva tvām+kadā nu syām+upasthitaḥ || [BhStc_113-paus] nimeṣam+api yadi+ekam+kṣīṇadoṣe kariṣyasi | padam+citte tadā śambho kim+na sampādayiṣyasi || [BhStc_114-paus] dhanyas+asmi kṛtakṛtyas+asmi mahān+asmi+iti bhāvanā | bhavet+sālambanā tasya yas+tvadālambanas+prabho || [BhStc_115-paus] śubhāśubhasya sarvasya svayam+kartā bhavān+api | bhavadbhaktis+tu jananī śubhasya+eva+īśa kevalam || [BhStc_116-paus] prasanne manasi svāmin+kim+tvam+niviśase kim+u | tvatpraveśāt+prasīdet+tat+iti dolāyate janaḥ || [BhStc_117-paus] niścayas+punar+eṣas+atra tvadadhiṣṭhānam+eva hi | prasādas+manasas+svāmin+sā siddhis+tat+param+padam || [BhStc_118-paus] vacas+cetas+ca kāryam+ca śarīram+mama yat+prabho | tvatprasādena tat+bhūyāt+bhavadbhāvaikabhūṣaṇam || [BhStc_119-paus] stavacintāmaṇim+bhūrimanorathaphalapradam | bhaktilakṣmyālayam+śambhos+bhaṭṭanārāyaṇas+vyadhāt || [BhStc_120-paus]